ആലപ്പുഴ: നിരോധിത പുകയില കടത്ത് വിവാദത്തെത്തുടർന്ന് പാർട്ടിയിൽ നിന്ന് പുറത്താക്കിയ എ. ഷാനവാസിനെ സി.പി.എം തിരിച്ചെടുത്തു. അപേക്ഷ പരിഗണിച്ചാണ് ജില്ലാ സെക്രട്ടേറിയറ്റിന്റെ തീരുമാനം. തിരഞ്ഞെടുപ്പ് പ്രഖ്യാപിച്ച സാഹചര്യത്തിലാണ് അപേക്ഷ പരിഗണിക്കുന്നത് നീട്ടിവെച്ചിരുന്നത്.(Tobacco smuggling controversy, CPM reinstates A Shanavas)
ലഹരിക്കടത്തിൽ ഷാനവാസിന് പങ്കില്ലെന്ന് ചൂണ്ടിക്കാട്ടി സ്പെഷ്യൽ ബ്രാഞ്ച് ജില്ലാ പോലീസ് മേധാവിക്ക് റിപ്പോർട്ട് നൽകിയിരുന്നു. വാഹനം വാടകയ്ക്ക് നൽകിയതാണെന്ന ഷാനവാസിന്റെ വാദം ശരിവെച്ച പോലീസ്, അദ്ദേഹത്തിനെതിരെ തെളിവുകളില്ലെന്നും വ്യക്തമാക്കി.
പാർട്ടിയിൽ നിന്ന് പുറത്തായിരുന്ന സമയത്തും ആലപ്പുഴ നഗരസഭയിലെ തോണ്ടൻകുളങ്ങര വാർഡിൽ എൽ.ഡി.എഫ് സ്ഥാനാർത്ഥിയായി മത്സരിച്ച ഷാനവാസ് വിജയിച്ചിരുന്നു. ഇത് പാർട്ടിക്ക് പ്രാദേശികമായുള്ള അദ്ദേഹത്തിന്റെ സ്വാധീനം വ്യക്തമാക്കുന്നതായിരുന്നു.
