ജെറൂസലേം: ദീർഘകാലമായി തുടരുന്ന അഴിമതിക്കേസുകളിൽ പ്രധാനമന്ത്രി ബെഞ്ചമിൻ നെതന്യാഹു നൽകിയ മാപ്പ് അപേക്ഷയിൽ ഉടൻ തീരുമാനമുണ്ടാകില്ലെന്ന് ഇസ്രായേൽ പ്രസിഡന്റ് ഐസക് ഹെർസോഗ് (Benjamin Netanyahu Corruption Trial). കോടതിക്ക് പുറത്ത് ഇരുവിഭാഗവും തമ്മിൽ ഒരു ഒത്തുതീർപ്പിലെത്തുന്ന കാര്യത്തിൽ എല്ലാ സാധ്യതകളും പരിശോധിച്ചതിന് ശേഷം മാത്രമേ മാപ്പ് നൽകുന്നതിനെക്കുറിച്ച് ആലോചിക്കൂ എന്ന് അദ്ദേഹം വ്യക്തമാക്കി.
നെതന്യാഹുവിന്റെ കേസിൽ ഒരു ഒത്തുതീർപ്പ് കരാറിലെത്തുന്നതാണ് ഏറ്റവും നല്ല പരിഹാരമെന്ന് ഹെർസോഗ് വിശ്വസിക്കുന്നു. ഹർജിയിൽ നേരിട്ട് തീരുമാനമെടുക്കുന്നതിന് പകരം വിട്ടുവീഴ്ചയ്ക്കുള്ള ചർച്ചകൾക്ക് പ്രസിഡന്റ് മധ്യസ്ഥത വഹിച്ചേക്കുമെന്ന് റിപ്പോർട്ടുകളുണ്ട്. കൈക്കൂലി, വഞ്ചന, വിശ്വാസവഞ്ചന തുടങ്ങിയ കുറ്റങ്ങൾ ചുമത്തി 2019-ലാണ് നെതന്യാഹുവിനെതിരെ കുറ്റപത്രം സമർപ്പിച്ചത്. 2020-ൽ വിചാരണ ആരംഭിച്ചു. എന്നാൽ തനിക്കെതിരെയുള്ള എല്ലാ ആരോപണങ്ങളും നെതന്യാഹു നിഷേധിക്കുകയാണ്.
യുഎസ് പ്രസിഡന്റ് ഡൊണാൾഡ് ട്രംപ് പലതവണ നെതന്യാഹുവിന് മാപ്പ് നൽകണമെന്ന് പ്രസിഡന്റ് ഹെർസോഗിനോട് ആവശ്യപ്പെട്ടിരുന്നു. ഇറാൻ യുദ്ധത്തിനിടയിൽ വിചാരണ നിർത്തിവെച്ച സമയത്തടക്കം ട്രംപ് ഈ ആവശ്യം ഉന്നയിച്ചിരുന്നു. വിചാരണ പൂർത്തിയാകുന്നതിന് മുൻപ് ഒരു കുറ്റാരോപിതന് പ്രസിഡന്റ് മാപ്പ് നൽകുന്നത് ഇസ്രായേൽ ചരിത്രത്തിൽ ഇതുവരെ ഉണ്ടാകാത്ത കാര്യമാണ്. അതിനാൽ തന്നെ ഹെർസോഗിന്റെ തീരുമാനം അതീവ പ്രാധാന്യമർഹിക്കുന്നു. അടുത്ത കുറച്ച് ദിവസങ്ങൾക്കുള്ളിൽ നെതന്യാഹു വീണ്ടും കോടതിയിൽ ഹാജരാകേണ്ടതുണ്ട്. 2026 ഒക്ടോബറിൽ ഇസ്രായേലിൽ അടുത്ത പൊതുതിരഞ്ഞെടുപ്പ് നടക്കാനിരിക്കെ നെതന്യാഹുവിന്റെ നിയമപോരാട്ടങ്ങൾ രാജ്യത്തെ രാഷ്ട്രീയ സാഹചര്യത്തെ കൂടുതൽ സങ്കീർണ്ണമാക്കുകയാണ്.
Summary: Israeli President Isaac Herzog stated that he would only consider Prime Minister Benjamin Netanyahu’s pardon request after all efforts to reach a plea deal outside the courtroom are exhausted. Netanyahu, facing bribery and fraud charges since his 2019 indictment, has maintained his innocence. While US President Donald Trump has repeatedly urged Herzog to grant the pardon, the President’s office suggested a settlement between the parties is currently the preferred solution. The trial is set to resume this week, ahead of the general elections scheduled for late 2026.
