ചെന്നൈ: ഏറെ പ്രതീക്ഷയോടെ പ്രേക്ഷകർ കാത്തിരിക്കുന്ന ധനുഷ് ചിത്രം ‘കര’യുടെ റിലീസ് വിശേഷങ്ങൾക്കിടെ തന്റെ ഭാവി പദ്ധതികളെക്കുറിച്ച് മനസ്സ് തുറന്ന് താരം. ‘പോർ തൊഴിൽ’ എന്ന സൂപ്പർഹിറ്റ് ചിത്രത്തിന് ശേഷം വിഘ്നേശ് രാജ സംവിധാനം ചെയ്യുന്ന ഈ ചിത്രത്തിൽ മമിത ബൈജുവാണ് നായികയായെത്തുന്നത്.(Dhanush delays next directorial, says he needs a few years to finish commitments)
ധനുഷ് സംവിധാനം ചെയ്യുന്ന അടുത്ത ചിത്രം എന്ന് പുറത്തിറങ്ങുമെന്ന ചോദ്യത്തിന് താരം വ്യക്തമായ മറുപടി നൽകി. നിലവിൽ അഭിനയിച്ചു തീർക്കാനുള്ള സിനിമകളുടെ തിരക്ക് കാരണം സംവിധാനത്തിലേക്ക് മടങ്ങാൻ വർഷങ്ങൾ വേണ്ടിവരുമെന്നാണ് ധനുഷ് പറയുന്നത്. രാജ്കുമാർ പെരിയസാമി സംവിധാനം ചെയ്യുന്ന ചിത്രത്തിലാണ് ധനുഷ് അടുത്തതായി അഭിനയിക്കുന്നത്.
ഇതിനുശേഷം മാരി സെൽവരാജിനൊപ്പമുള്ള ബിഗ് ബജറ്റ് ചിത്രത്തിൽ ധനുഷ് ഭാഗമാകും. ‘ലബ്ബർ പന്ത്’ എന്ന ചിത്രത്തിലൂടെ ശ്രദ്ധേയനായ പച്ചൈമുത്തു തമിഴരസന്റെ സിനിമയും ഇതിന് പിന്നാലെയുണ്ടാകും. ഈ സിനിമകളെല്ലാം പൂർത്തിയാക്കാൻ കുറഞ്ഞത് രണ്ട് വർഷമെങ്കിലും വേണ്ടി വരുമെന്നും അതിനുശേഷം മാത്രമേ സംവിധാനത്തെക്കുറിച്ച് ചിന്തിക്കൂ എന്നും ധനുഷ് വ്യക്തമാക്കി.
