തിരുവനന്തപുരം: വട്ടിയൂർക്കാവ് പൊലീസ് സ്റ്റേഷനിലേക്ക് ബിജെപി നടത്തിയ മാർച്ചിൽ വിവാദ മുദ്രാവാക്യം വിളിച്ച മുൻ ഡിജിപി ആർ. ശ്രീലേഖയെ പോലീസ് പ്രതി ചേർത്തു (R Sreelekha ). സംസ്ഥാനത്തെ ആദ്യ വനിതാ ഐപിഎസ് ഓഫീസറായ ശ്രീലേഖയെ കേസിലെ അഞ്ചാം പ്രതിയാക്കിയാണ് നെടുമങ്ങാട് ജുഡീഷ്യൽ മജിസ്ട്രേറ്റ് കോടതിയിൽ പോലീസ് പ്രത്യേക റിപ്പോർട്ട് സമർപ്പിച്ചത്. തിരുവനന്തപുരം ഡെപ്യൂട്ടി മേയർ ആശാനാഥാണ് കേസിലെ ആറാം പ്രതി.
വട്ടിയൂർക്കാവ് നെട്ടയത്ത് ബിജെപി പ്രവർത്തകർക്കെതിരെയുണ്ടായ പോലീസ് നടപടിയിൽ പ്രതിഷേധിച്ചായിരുന്നു മഹിളാമോർച്ചയുടെ നേതൃത്വത്തിൽ മാർച്ച് സംഘടിപ്പിച്ചത്. മാർച്ച് ഉദ്ഘാടനം ചെയ്തത് ആർ. ശ്രീലേഖയായിരുന്നു. ഉദ്ഘാടന പ്രസംഗത്തിനിടെയും മാർച്ചിലുടനീളവും “പോടാ പുല്ലേ പൊലീസേ, പിണറായിയുടെ തെമ്മാടികളേ” എന്ന മുദ്രാവാക്യം ശ്രീലേഖ വിളിച്ചത് വലിയ വാർത്തയായിരുന്നു. സഹപ്രവർത്തകരായിരുന്ന പോലീസുകാരെ പരസ്യമായി അധിക്ഷേപിച്ചതിനെതിരെ സേനയ്ക്കുള്ളിൽ തന്നെ വലിയ പ്രതിഷേധമുയർന്നിരുന്നു.
ആദ്യഘട്ടത്തിൽ തയ്യാറാക്കിയ എഫ്ഐആറിൽ ശ്രീലേഖയുടെ പേര് ഉൾപ്പെടുത്തിയിരുന്നില്ല. ഇതിനെതിരെ വട്ടിയൂർക്കാവ് എംഎൽഎ വി.കെ. പ്രശാന്ത് അടക്കമുള്ളവർ രംഗത്തെത്തിയിരുന്നു. മുതിർന്ന മുൻ ഉദ്യോഗസ്ഥ എന്ന പരിഗണന നൽകി ശ്രീലേഖയെ ഒഴിവാക്കിയതിനെതിരെ വിമർശനം ശക്തമായതോടെയാണ് പോലീസ് നിലപാട് മാറ്റിയത്. വഴിതടയൽ, പോലീസിനെ ഔദ്യോഗിക കൃത്യനിർവ്വഹണത്തിൽ നിന്ന് തടസ്സപ്പെടുത്തൽ തുടങ്ങിയ വകുപ്പുകളാണ് ഇവർക്കെതിരെ ചുമത്തിയിരിക്കുന്നത്.
തിരുവനന്തപുരം കോർപ്പറേഷനിലെ ശാസ്തമംഗലം വാർഡിൽ നിന്നുള്ള ബിജെപി കൗൺസിലറാണ് നിലവിൽ ആർ. ശ്രീലേഖ. പോലീസിന്റെ നടപടിയെക്കുറിച്ച് “അവർ അവരുടെ ജോലി ചെയ്യട്ടെ” എന്നായിരുന്നു ശ്രീലേഖയുടെ പ്രതികരണം.
Story Summary: Former DGP R. Sreelekha has been named the fifth accused in the Vattiyoorkavu police station march case. The action follows a controversial slogan she raised against the police force during the protest. While she was initially excluded from the FIR, the police submitted a special report to the court including her and Deputy Mayor Ashanath as accused after widespread criticism.
