കോഴഞ്ചേരി: ആയൂരിൽ കാറും ലോറിയും കൂട്ടിയിടിച്ച് ഉണ്ടായ അപകടത്തിൽ അച്ഛനും മകനും ദാരുണാന്ത്യം (Ayoor Road Accident).തിരുവനന്തപുരത്തെ വിനോദസഞ്ചാര കേന്ദ്രമായ ഹാപ്പി ലാൻഡ് സന്ദർശിച്ച് മടങ്ങിപ്പോകുകയായിരുന്ന കുടുംബമാണ് അപകടത്തിൽപ്പെട്ടത്. ചൊവ്വാഴ്ച വൈകുന്നേരം 4.30-ഓടെ ആയൂർ പാലത്തിന് സമീപം വെച്ചായിരുന്നു അപകടം.കോഴഞ്ചേരി ഭാഗത്തേക്ക് വരികയായിരുന്ന കാറും തിരുവനന്തപുരം ഭാഗത്തേക്ക് പോകുകയായിരുന്ന ലോറിയും തമ്മിലാണ് കൂട്ടിയിടിച്ചത്. റോബിൻ നൈനാൻ, പിതാവ് നൈനാൻ വർഗീസ് എന്നിവരാണ് മരിച്ചത്.
കാർ ഓടിച്ചിരുന്ന റോബിൻ നൈനാൻ ഡ്രൈവർ സീറ്റിൽ കുടുങ്ങിപ്പോയിരുന്നു. അഗ്നിരക്ഷാസേന കാർ വെട്ടിപ്പൊളിച്ചാണ് ഇദ്ദേഹത്തെ പുറത്തെടുത്തത്. കടയ്ക്കൽ നിന്നെത്തിയ അഗ്നിരക്ഷാസേനയും ചടയമംഗലം പോലീസും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. നൈനാൻ വർഗീസിന്റെ ഭാര്യ റോസി നൈനാൻ, റോബിന്റെ മക്കളായ ആദം, അഥീൽ എന്നിവർക്ക് ഗുരുതരമായി പരിക്കേറ്റു. ഇവർ നിലവിൽ വിവിധ ആശുപത്രികളിൽ തീവ്രപരിചരണ വിഭാഗത്തിൽ ചികിത്സയിലാണ്.
റോബിന്റെ മൃതദേഹം പാരിപ്പള്ളി മെഡിക്കൽ കോളേജിലും നൈനാൻ വർഗീസിന്റേത് കൊട്ടാരക്കര താലൂക്കാശുപത്രിയിലും സൂക്ഷിച്ചിരിക്കുകയാണ്. അപകടത്തെത്തുടർന്ന് എം.സി റോഡിൽ മണിക്കൂറുകളോളം ഗതാഗതക്കുരുക്ക് അനുഭവപ്പെട്ടു. പ്രദേശത്ത് പെയ്ത മഴ രക്ഷാപ്രവർത്തനത്തിന് വെല്ലുവിളിയുയർത്തിയിരുന്നു. ചടയമംഗലം പോലീസ് കേസെടുത്ത് അന്വേഷണം ആരംഭിച്ചു.
Story Summary: A tragic road accident near Ayur bridge claimed the lives of a father and son from Kozhencherry. Nainan Varghese (70) and his son Robin Nainan (33) died when their car collided with a lorry while returning from a trip to Thiruvananthapuram. Three others, including Robin’s mother and his two children, are in critical condition.
