ടെഹ്റാൻ: പാകിസ്ഥാനിൽ വെച്ച് അമേരിക്കയുമായി നടത്താനിരുന്ന സമാധാന ചർച്ചകളിൽ പങ്കെടുക്കുന്ന കാര്യത്തിൽ ഇറാൻ പുനർചിന്തനം നടത്തുന്നു. രണ്ടാഴ്ചത്തെ വെടിനിർത്തൽ കാലാവധി അവസാനിക്കാൻ ദിവസങ്ങൾ മാത്രം ബാക്കിനിൽക്കെ, അമേരിക്ക ഏർപ്പെടുത്തിയ തുറമുഖ ഉപരോധവും വെടിനിർത്തൽ ലംഘനങ്ങളുമാണ് ടെഹ്റാനെ പിന്നോട്ട് വലിപ്പിക്കുന്നത് (Iran US Peace Talks Pakistan).
പാകിസ്ഥാനിലെ ഇസ്ലാമാബാദിൽ ചർച്ചകൾക്ക് വേദിയൊരുങ്ങുന്നുണ്ടെങ്കിലും ഇറാൻ ഇതുവരെ ഔദ്യോഗികമായി സമ്മതം മൂളിയിട്ടില്ല. ഭീഷണിക്ക് വഴങ്ങി ചർച്ചയ്ക്കില്ലെന്നാണ് ഇറാന്റെ നിലപാട്. ഉപരോധം പിൻവലിക്കണമെന്ന് മധ്യസ്ഥരായ പാകിസ്ഥാൻ അമേരിക്കയോട് ആവശ്യപ്പെട്ടിട്ടുണ്ട്. ഏപ്രിൽ 7-ന് ഡൊണാൾഡ് ട്രംപ് പ്രഖ്യാപിച്ച രണ്ടാഴ്ചത്തെ വെടിനിർത്തൽ ബുധനാഴ്ച രാത്രി (ഇറാൻ സമയം വ്യാഴാഴ്ച പുലർച്ചെ) അവസാനിക്കും. ഇതിനുള്ളിൽ ചർച്ചകൾ നടന്നില്ലെങ്കിൽ മേഖല വീണ്ടും കടുത്ത യുദ്ധത്തിലേക്ക് നീങ്ങുമെന്ന ആശങ്ക ശക്തമാണ്. ചൈനയിൽ നിന്ന് വരികയായിരുന്ന ഇറാനിയൻ ചരക്ക് കപ്പൽ യുഎസ് സൈന്യം വെടിവെച്ച് പിടിച്ചെടുത്തത് സ്ഥിതിഗതികൾ വഷളാക്കി. ഇത് ‘കടൽക്കൊള്ള’യാണെന്ന് ഇറാൻ ആരോപിച്ചു. ഹോർമുസ് കടലിടുക്ക് വഴിയുള്ള ഗതാഗതം ഇപ്പോൾ ഭാഗികമായി തടസ്സപ്പെട്ടിരിക്കുകയാണ്. സംഘർഷം കടുക്കുമെന്ന ഭീതിയിൽ ആഗോള വിപണിയിൽ എണ്ണവില 5 ശതമാനം വർദ്ധിച്ചു. പെട്ടെന്നുള്ള ഒരു ആണവ കരാറിലൂടെ പ്രശ്നം പരിഹരിക്കാമെന്നാണ് ട്രംപിന്റെ അവകാശവാദം.
ഇറാൻ പ്രസിഡന്റിന്റെ പ്രതികരണം: അമേരിക്കയുടേത് വൈരുദ്ധ്യം നിറഞ്ഞ നിലപാടാണെന്നും ഇറാന്റെ കീഴടങ്ങലാണ് അവർ ആഗ്രഹിക്കുന്നതെന്നും പ്രസിഡന്റ് മസൂദ് പെസെഷ്കിയൻ പറഞ്ഞു. അതേസമയം, ചർച്ചകൾക്ക് സുരക്ഷയൊരുക്കാൻ 20,000 സൈനികരെയാണ് പാകിസ്ഥാൻ വിന്യസിച്ചിരിക്കുന്നത്.
Summary: The future of peace talks between Iran and the U.S. in Pakistan remains uncertain as a two-week ceasefire is set to expire this Wednesday. Iran is “positively reviewing” participation but cites the U.S. naval blockade and recent seizure of an Iranian cargo ship as major hurdles. President Trump predicts a quick nuclear deal, but Tehran rejects negotiations under threat. Global oil prices rose by 5% due to fears of a collapse in the diplomatic process.
