പൂനെ : നവി മുംബൈയിലെ ഏറ്റവും സുരക്ഷിതമെന്ന് കരുതപ്പെടുന്ന സിബിഡി ബേലാപ്പൂരിലെ (CBD Belapur) എൻഎംഎംസി ആസ്ഥാനത്തിന് തൊട്ടുപുറത്തായി യുവാവിനെ അതിക്രൂരമായി കൊലപ്പെടുത്തി (Navi Mumbai Murder News Today). ആൾക്കൂട്ടവും സുരക്ഷാ ഉദ്യോഗസ്ഥരും ഉള്ള മേഖലയിൽ നടന്ന ഈ അക്രമം നഗരത്തെ നടുക്കിയിരിക്കുകയാണ്.വെള്ളിയാഴ്ച രാത്രി വൈകിയാണ് സംഭവം നടന്നത്. എൻഎംഎംസി ആസ്ഥാനത്തിന് പുറത്തുള്ള ഫുട്പാത്തിൽ വെച്ച് അജ്ഞാതരായ സംഘം യുവാവിനെ ആക്രമിക്കുകയായിരുന്നു.
മാരകായുധങ്ങളും കല്ലുകളും ഉപയോഗിച്ച് യുവാവിനെ തലയ്ക്കടിച്ചാണ് കൊലപ്പെടുത്തിയത്. മുഖം തിരിച്ചറിയാൻ കഴിയാത്ത വിധം വികൃതമാക്കിയിട്ടുണ്ട്. വിവരമറിഞ്ഞ് സിബിഡി ബേലാപ്പൂർ പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. മൃതദേഹം പോസ്റ്റ്മോർട്ടത്തിനായി വാശിയിലെ ആശുപത്രിയിലേക്ക് മാറ്റി. കൊല്ലപ്പെട്ട വ്യക്തിയെ തിരിച്ചറിയാനുള്ള ശ്രമങ്ങൾ തുടരുകയാണ്.
സ്ഥലത്തെ സിസിടിവി ദൃശ്യങ്ങൾ പോലീസ് പരിശോധിച്ചു വരികയാണ്. പ്രതികൾ എത്ര പേരുണ്ടെന്നും കൊലപാതകത്തിന്റെ കാരണം എന്താണെന്നും വ്യക്തമായിട്ടില്ല. വ്യക്തിപരമായ ശത്രുതയാണോ അതോ പെട്ടെന്നുണ്ടായ തർക്കമാണോ എന്ന് പോലീസ് അന്വേഷിക്കുന്നു. സിറ്റി പോലീസ് കമ്മീഷണറേറ്റിന് അടുത്തുള്ള ഇത്രയും തിരക്കുള്ള മേഖലയിൽ ഇത്തരമൊരു കൊലപാതകം നടന്നത് നവി മുംബൈയിലെ ക്രമസമാധാന നിലയെക്കുറിച്ച് വലിയ ചോദ്യങ്ങൾ ഉയർത്തുന്നുണ്ട്.
