Follow on Google News
ന്യൂഡൽഹി: ഇന്ത്യയിലെ 2027-ലെ സെൻസസ് നടപടികൾക്ക് പുതിയൊരു തുടക്കം. ഇനി ഉദ്യോഗസ്ഥർ വീട്ടിലെത്തുന്നത് വരെ കാത്തിരിക്കാതെ തന്നെ നിങ്ങൾക്ക് സ്വന്തം വിവരങ്ങൾ ഓൺലൈനായി സമർപ്പിക്കാം. ‘സെൽഫ് എന്യൂമറേഷൻ’ (SE) എന്ന് വിളിക്കുന്ന ഈ സംവിധാനത്തിലൂടെ വെറും 15 മിനിറ്റിനുള്ളിൽ നടപടികൾ പൂർത്തിയാക്കാൻ സാധിക്കും. ആദ്യ ഘട്ടമായ ഹൗസ് ലിസ്റ്റിംഗ്, ഹൗസിംഗ് സെൻസസ് എന്നിവയാണ് ഇപ്പോൾ നടക്കുന്നത് (Census 2027 Online Registration).
ഓൺലൈനായി വിവരങ്ങൾ സമർപ്പിക്കേണ്ട രീതി:
- പോർട്ടൽ സന്ദർശിക്കുക: http://se.census.gov.in എന്ന വെബ്സൈറ്റിൽ പ്രവേശിക്കുക. നിങ്ങളുടെ സംസ്ഥാനം തിരഞ്ഞെടുത്ത് ക്യാപ്ച (CAPTCHA) നൽകി ‘Verify & Proceed’ ക്ലിക്ക് ചെയ്യുക.
- രജിസ്ട്രേഷൻ: ഗൃഹനാഥന്റെ പേര്, മൊബൈൽ നമ്പർ എന്നിവ നൽകുക. ഫോണിൽ ലഭിക്കുന്ന 6 അക്ക OTP ഉപയോഗിച്ച് ലോഗിൻ ചെയ്യുക. നിങ്ങൾക്ക് താല്പര്യമുള്ള ഭാഷ തിരഞ്ഞെടുക്കാവുന്നതാണ്.
- വീടിന്റെ വിവരങ്ങൾ (Section A): വീടിന്റെ തറ, ചുവര്, മേൽക്കൂര എന്നിവ നിർമ്മിച്ചിരിക്കുന്ന വസ്തുക്കൾ, വീടിന്റെ അവസ്ഥ എന്നിവ രേഖപ്പെടുത്തുക.
- അംഗങ്ങളുടെ വിവരങ്ങൾ (Section B): വീട്ടിലെ താമസക്കാരുടെ എണ്ണം, സാമൂഹിക വിഭാഗം (Social Category), വീടിന്റെ ഉടമസ്ഥാവകാശം, മുറികളുടെ എണ്ണം തുടങ്ങിയവ നൽകുക.
- സൗകര്യങ്ങൾ (Section C): കുടിവെള്ള സ്രോതസ്സ്, വൈദ്യുതി, ശുചിമുറി സൗകര്യം, ഡ്രെയിനേജ് സംവിധാനം, അടുക്കള, പാചകത്തിന് ഉപയോഗിക്കുന്ന ഇന്ധനം തുടങ്ങിയ വിവരങ്ങൾ ഇവിടെ ഉൾപ്പെടുത്തുക.
- ആസ്തികൾ (Section D): ടെലിവിഷൻ, ഇന്റർനെറ്റ്, ലാപ്ടോപ്പ്, വാഹനങ്ങൾ (സൈക്കിൾ, കാർ മുതലായവ) എന്നിവയുണ്ടോ എന്ന് രേഖപ്പെടുത്തുക. പ്രധാനമായും ഉപയോഗിക്കുന്ന ധാന്യം ഏതാണെന്നും നൽകുക.
- പ്രിവ്യൂവും സബ്മിറ്റും: നൽകിയ വിവരങ്ങൾ ഒരിക്കൽ കൂടി പരിശോധിച്ച ശേഷം ‘Submit‘ ബട്ടൺ അമർത്തുക.
ശ്രദ്ധിക്കുക: വിവരങ്ങൾ സമർപ്പിച്ചു കഴിഞ്ഞാൽ നിങ്ങൾക്ക് ഒരു യുണീക്ക് SE ID ലഭിക്കും. ഇത് സ്ക്രീൻഷോട്ട് എടുത്തോ കുറിച്ചുവെച്ചോ സൂക്ഷിക്കുക. പിന്നീട് ഉദ്യോഗസ്ഥർ നിങ്ങളുടെ വീട് സന്ദർശിക്കുമ്പോൾ ഈ ഐഡി കൈമാറേണ്ടതുണ്ട്.
