Follow on Google News
ടെഹ്റാൻ: ഇറാനിൽ ഈ വർഷം ജനുവരിയിൽ പൊട്ടിപ്പുറപ്പെട്ട സർക്കാർ വിരുദ്ധ പ്രക്ഷോഭങ്ങളിൽ പങ്കെടുത്ത വനിതയ്ക്ക് വധശിക്ഷ വിധിച്ചു. പ്രക്ഷോഭങ്ങളുമായി ബന്ധപ്പെട്ട് വധശിക്ഷയ്ക്ക് വിധിക്കപ്പെടുന്ന ആദ്യ വനിതയാണ് ബിത ഹമ്മതി. കഴിഞ്ഞ ഒരു വർഷത്തിനിടെ ഇസ്ലാമിക് റിപ്പബ്ലിക് വധശിക്ഷയ്ക്ക് വിധിച്ച 1,600-ഓളം വ്യക്തികളിൽ ഒരാളാണ് ബിതയെന്ന് മനുഷ്യാവകാശ സംഘടനകൾ റിപ്പോർട്ട് ചെയ്യുന്നു.(Iran to execute the first woman over widespread anti-regime demonstrations)
ദേശീയ സുരക്ഷ തകർക്കുക, സ്ഫോടകവസ്തുക്കളും ആയുധങ്ങളും കൈവശം വെക്കുക, സുരക്ഷാ സേനയ്ക്ക് നേരെ കോൺക്രീറ്റ് ബ്ലോക്കുകൾ എറിയുക, നിയമവിരുദ്ധമായ പ്രതിഷേധ കൂട്ടായ്മകളിൽ പങ്കെടുക്കുക തുടങ്ങിയ കുറ്റങ്ങളാണ് ബിതയ്ക്ക് മേൽ ഇറാൻ ഭരണകൂടം ചുമത്തിയിരിക്കുന്നത്. നാഷണൽ കൗൺസിൽ ഓഫ് റെസിസ്റ്റൻസ് ഓഫ് ഇറാൻ പുറത്തുവിട്ട വാർത്താക്കുറിപ്പിലാണ് ഇക്കാര്യം വ്യക്തമാക്കിയത്.
ബിത ഹമ്മതിയെ കൂടാതെ അവരുടെ ഭർത്താവ് മുഹമ്മദ്റെസ മജിദ് അസ്ൽ (34), ഇവർ താമസിച്ചിരുന്ന ഫ്ലാറ്റിലെ മറ്റ് താമസക്കാരായ ബെഹ്റൂസ്, കുറോഷ് സമാനിനെഷാദ് എന്നിവർക്കും കോടതി വധശിക്ഷ വിധിച്ചിട്ടുണ്ട്. വളരെ വേഗത്തിൽ പൂർത്തിയാക്കിയ വിചാരണയ്ക്ക് പിന്നാലെ ഇവരുടെ സ്വത്തുക്കൾ കണ്ടുകെട്ടാനും കോടതി ഉത്തരവിട്ടു.
ബിതയുടെ ബന്ധുവായ അമീർ ഹമ്മതിക്ക് ഭരണകൂട വിരുദ്ധ പ്രചാരണം നടത്തിയെന്ന കുറ്റത്തിന് ആറ് വർഷം തടവ് ശിക്ഷ വിധിച്ചു. പ്രതികൾ അമേരിക്കൻ സർക്കാരിനും മറ്റ് ശത്രുരാജ്യങ്ങൾക്കും വേണ്ടി പ്രവർത്തിച്ചു എന്നാണ് ഇറാൻ ഗവൺമെന്റ് ആരോപിക്കുന്നത്. കഴിഞ്ഞ ഡിസംബർ അവസാന വാരം ടെഹ്റാനിലെ കച്ചവടക്കാർ ആരംഭിച്ച പണിമുടക്കാണ് രാജ്യവ്യാപകമായ പ്രക്ഷോഭമായി മാറിയത്. ജനുവരിയോടെ വിദ്യാർത്ഥികളുൾപ്പെടെയുള്ളവർ തെരുവിലിറങ്ങി. സർക്കാർ നടത്തിയ ക്രൂരമായ അടിച്ചമർത്തലിൽ ആയിരക്കണക്കിന് ആളുകൾ കൊല്ലപ്പെടുകയും പതിനായിരങ്ങൾ തടവിലാക്കപ്പെടുകയും ചെയ്തിട്ടുണ്ട്. വധശിക്ഷ നടപ്പാക്കുന്ന തീയതി ഇതുവരെ പ്രഖ്യാപിച്ചിട്ടില്ല.
