ടെഹ്റാൻ: ഹോർമുസ് കടലിടുക്കിൽ അമേരിക്കൻ പ്രസിഡന്റ് ഡൊണാൾഡ് ട്രംപ് നാവിക ഉപരോധം പ്രഖ്യാപിച്ചതിന് പിന്നാലെ, ആഗോള വിപണിയിൽ ഇന്ധനവില നിയന്ത്രണാതീതമായി വർദ്ധിക്കുമെന്ന് മുന്നറിയിപ്പ് നൽകി ഇറാൻ. നിലവിലെ ഇന്ധനവില ഉടൻ തന്നെ പഴങ്കഥയാകുമെന്നും ലോകം വലിയ വിലക്കയറ്റത്തിന് സാക്ഷ്യം വഹിക്കുമെന്നും ഇറാൻ പാർലമെന്റ് സ്പീക്കർ മുഹമ്മദ് ബാഗർ ഖാലിബാഫ് പറഞ്ഞു.(Enjoy it now, Iran warns Trump of oil price surge )
സോഷ്യൽ മീഡിയയിലൂടെയായിരുന്നു ഖാലിബാഫിന്റെ പ്രതികരണം. “ഇപ്പോഴത്തെ പെട്രോൾ വില കണ്ട് സന്തോഷിച്ചോളൂ. ഈ ഉപരോധം നടപ്പിലാകുന്നതോടെ, ഗാലന് 4-5 ഡോളർ എന്ന നിലവിലെ നിരക്കിനെ നിങ്ങൾ നോസ്റ്റാൾജിയയോടെ ഓർക്കുന്ന കാലം വരും,” അദ്ദേഹം കുറിച്ചു. ഹോർമുസ് കടലിടുക്കിലെ ഉപരോധം എണ്ണവിലയിൽ ലളിതമായ വർദ്ധനവിനേക്കാൾ ഉപരിയായി സങ്കീർണ്ണവും അതിവേഗത്തിലുള്ളതുമായ വർദ്ധനവ് ഉണ്ടാക്കുമെന്ന് അദ്ദേഹം ഒരു ഗണിത സമവാക്യത്തിലൂടെ സൂചിപ്പിച്ചു: ΔO_BSOH > 0 ⇒ f(f(O)) > f(O)
ഇറാനും അമേരിക്കയും തമ്മിൽ പാകിസ്ഥാനിൽ വെച്ച് നടന്ന സമാധാന ചർച്ചകൾ പരാജയപ്പെട്ടതാണ് നിലവിലെ സംഘർഷത്തിന് കാരണം. വെടിനിർത്തൽ നീട്ടുന്നതിനായി ദിവസങ്ങളോളം ചർച്ചകൾ നടന്നുവെങ്കിലും ഇറാൻ ആണവ പദ്ധതിയുടെ കാര്യത്തിലും ഹോർമുസ് കടലിടുക്കിന്റെ നിയന്ത്രണത്തിലും ധാരണയിലെത്താൻ ഇരുപക്ഷത്തിനും കഴിഞ്ഞില്ല. ഇറാന്റെ ആവശ്യങ്ങൾ അമിതമാണെന്ന് അമേരിക്കൻ ഉദ്യോഗസ്ഥരും തങ്ങളുടെ പരമാധികാരത്തിൽ വിട്ടുവീഴ്ചയില്ലെന്ന് ഇറാനും നിലപാടെടുത്തു.
ഇറാനിയൻ തുറമുഖങ്ങളിലേക്കോ അവിടെ നിന്നോ ഉള്ള എല്ലാ കപ്പലുകളെയും തടയുമെന്ന് യുഎസ് സെൻട്രൽ കമാൻഡ് അറിയിച്ചു. എന്നാൽ ഹോർമുസ് കടലിടുക്കിലൂടെ മറ്റ് രാജ്യങ്ങളിലേക്ക് പോകുന്ന കപ്പലുകളെ നിലവിൽ തടയില്ല. ലോകത്തെ എണ്ണവിതരണത്തിന്റെ പ്രധാന പാതയായ ഹോർമുസിനെ യുഎസ് സൈന്യം വളയുന്നത് ആഗോള തലത്തിൽ വലിയ ആശങ്കയുണ്ടാക്കിയിട്ടുണ്ട്.
ഇറാൻ ഒടുവിൽ അമേരിക്കയുടെ ആവശ്യങ്ങൾക്ക് വഴങ്ങുമെന്ന് ട്രംപ് ആത്മവിശ്വാസം പ്രകടിപ്പിച്ചു. “അവർ തിരിച്ചുവന്ന് നമ്മൾ ആവശ്യപ്പെടുന്നതെല്ലാം തരുമെന്നാണ് എന്റെ പ്രവചനം. അവരുടെ കൈവശം മറ്റ് വഴികളില്ല,” ട്രംപ് പറഞ്ഞു. ഇറാൻ വഴങ്ങിയില്ലെങ്കിൽ കടുത്ത സൈനിക നടപടി ഉണ്ടാകുമെന്ന മുന്നറിയിപ്പും അദ്ദേഹം ആവർത്തിച്ചു. അമേരിക്കൻ ഭീഷണികൾ ഇറാൻ ജനതയെ ബാധിക്കില്ലെന്ന് ഖാലിബാഫ് തിരിച്ചടിച്ചു. “നിങ്ങൾ യുദ്ധത്തിനാണ് വരുന്നതെങ്കിൽ ഞങ്ങൾ യുദ്ധം ചെയ്യും. യുക്തിയോടെയാണ് വരുന്നതെങ്കിൽ യുക്തിയോടെ ഇടപഴകും. എന്നാൽ ഭീഷണികൾക്ക് മുന്നിൽ ഇറാൻ തലകുനിക്കില്ല,” അദ്ദേഹം വ്യക്തമാക്കി. ഹോർമുസ് കടലിടുക്കിലെ ഈ വടംവലി ലോക സമ്പദ്വ്യവസ്ഥയെ തന്നെ പ്രതിസന്ധിയിലാക്കുമെന്ന ഭീതിയിലാണ് ആഗോള വിപണി.
