Follow on Google News
കോട്ടയം: കത്തോലിക്കാ സഭയ്ക്കും ബിഷപ്പുമാർക്കുമെതിരെ രൂക്ഷവിമർശനം ഉന്നയിച്ച ബിജെപി നേതാക്കളായ പി.സി. ജോർജിനും ഷോൺ ജോർജിനും മറുപടിയുമായി സഭയുടെ മുഖപത്രമായ ‘ദീപിക’ (Deepika Editorial Against PC George). ഭീഷണിയുമായി ഏത് രാഷ്ട്രീയാവസരവാദി മുണ്ടുമടക്കിക്കുത്തി വന്നാലും സഭയുടെ നിലപാടിൽ മാറ്റമുണ്ടാകില്ലെന്ന് ദീപിക മുഖപ്രസംഗത്തിലൂടെ വ്യക്തമാക്കി. സഭയ്ക്കെതിരെ ഉയരുന്ന ഭീഷണികൾ ചരിത്രത്തിൽ ആദ്യത്തേതോ അവസാനത്തേതോ അല്ലെന്നും, ഇത്തരം വെല്ലുവിളികൾക്ക് മുന്നിൽ സഭ മുട്ടുമടക്കില്ലെന്നും മുഖപ്രസംഗം ചൂണ്ടിക്കാട്ടുന്നു.
എല്ലാവർക്കും വേണ്ടിയെന്ന് പറഞ്ഞ് പാസാക്കുന്ന പല നിയമങ്ങളും ന്യൂനപക്ഷങ്ങളെ മാത്രം വേട്ടയാടാൻ ഉപയോഗിക്കുന്ന ഉദാഹരണങ്ങൾ നിലനിൽക്കുന്നുണ്ടെന്ന് ദീപിക കുറ്റപ്പെടുത്തി. എഫ്.സി.ആർ.എ (FCRA) പോലുള്ള നിയമങ്ങളെക്കുറിച്ച് മിണ്ടിപ്പോകരുതെന്ന ഭീഷണികൾ വിലപ്പോകില്ല. മനുഷ്യവംശത്തിന്റെ നിലനിൽപ്പിനും എല്ലാവർക്കും സമാധാനത്തോടെ ജീവിക്കാനുമാണ് സഭ നിലകൊള്ളുന്നത്. രാഷ്ട്രീയം ദുഷിപ്പുകാർ തട്ടിപ്പറിക്കരുതെന്നും നീതിക്കുവേണ്ടിയുള്ള നിലപാടുകൾ ഇനിയും ഉറക്കെ പറയുമെന്നും മുഖപ്രസംഗം ഓർമ്മിപ്പിച്ചു.
സഭയുടെ ഔട്ട്റീച്ച് പ്രവർത്തനങ്ങളിൽ നിന്ന് വിട്ടുനിൽക്കുന്നവർക്കെതിരെയും സഭയെ വിരട്ടാൻ നോക്കുന്ന രാഷ്ട്രീയക്കാർക്കെതിരെയുമുള്ള കൃത്യമായ താക്കീതായാണ് ദീപികയുടെ ഈ പ്രതികരണം വിലയിരുത്തപ്പെടുന്നത്. പി.സി. ജോർജ് നടത്തിയ വിവാദ പരാമർശങ്ങൾ സഭയ്ക്കുള്ളിൽ വലിയ പ്രതിഷേധത്തിന് കാരണമായിരുന്നു. ഈ സാഹചര്യത്തിലാണ് സഭയുടെ ഔദ്യോഗിക നിലപാട് വ്യക്തമാക്കിക്കൊണ്ട് മുഖപത്രം രംഗത്തെത്തിയിരിക്കുന്നത്.
Summary: The Catholic Church daily ‘Deepika’ has issued a stern reply to BJP leaders P.C. George and Shaun George following their recent criticisms. In its editorial, Deepika stated that the Church will not alter its stance even if faced with threats from “political opportunists.” The newspaper emphasized that the Church would continue to advocate for justice and the rights of minorities, specifically mentioning that threats regarding laws like FCRA would not silence them. This response serves as a firm warning against attempts to intimidate the Church for political gains.
