ഭോപ്പാൽ: മധ്യപ്രദേശിലെ ധാർ ജില്ലയിൽ സുഗന്ധവ്യഞ്ജന വ്യാപാരിയായ യുവാവിനെ കൊലപ്പെടുത്തിയത് സ്വന്തം ഭാര്യയും കാമുകനും ചേർന്നാണെന്ന് പോലീസ് കണ്ടെത്തി (Madhya Pradesh Wife Kills Husband). ഏപ്രിൽ 7-ന് നടന്ന കൊലപാതകം കവർച്ചാശ്രമത്തിനിടെ ഉണ്ടായതാണെന്ന് വരുത്തിത്തീർക്കാൻ പ്രതികൾ ശ്രമിച്ചെങ്കിലും ശാസ്ത്രീയ അന്വേഷണത്തിൽ സത്യം പുറത്തുവരികയായിരുന്നു. 28-കാരനായ പുരോഹിത് ദേവ്കൃഷ്ണയാണ് കൊല്ലപ്പെട്ടത്. സംഭവത്തിൽ ഭാര്യ പ്രിയങ്ക പുരോഹിത് (25), കാമുകൻ കമലേഷ് പുരോഹിത് (32) എന്നിവരെ പോലീസ് അറസ്റ്റ് ചെയ്തു.
ദേവ്കൃഷ്ണയുടെ നിറം കുറവായതിന്റെ പേരിൽ പ്രിയങ്ക നിരന്തരം അദ്ദേഹത്തെ അപമാനിക്കാറുണ്ടായിരുന്നുവെന്ന് ബന്ധുക്കൾ മൊഴി നൽകി. “നീ കറുത്തവനാണ്, എന്നെപ്പോലെ സുന്ദരിയായ ഒരാളെ നീ അർഹിക്കുന്നില്ല” എന്ന് പ്രിയങ്ക എപ്പോഴും ഭർത്താവിനോട് പറയുമായിരുന്നു. ഇരുവരും തമ്മിൽ ദീർഘകാലമായി കുടുംബപ്രശ്നങ്ങൾ നിലനിന്നിരുന്നു. രാജ്ഗഢ് സ്വദേശിയായ കമലേഷുമായി പ്രിയങ്ക പ്രണയത്തിലായിരുന്നു. ഭർത്താവിനെ ഒഴിവാക്കാൻ ഇവർ ഒരു ലക്ഷം രൂപയ്ക്ക് ക്വട്ടേഷൻ നൽകുകയായിരുന്നു. സുരേന്ദ്ര ഭാട്ടി എന്നയാൾക്കാണ് കൊലപാതകത്തിനായി 50,000 രൂപ അഡ്വാൻസ് നൽകിയത്.
കൊലപാതകം നടന്ന രാത്രിയിൽ വീടിന്റെ വാതിൽ പ്രിയങ്ക മനഃപൂർവ്വം തുറന്നിട്ടിരുന്നു. ഉറങ്ങിക്കിടന്ന ദേവ്കൃഷ്ണയെ കൊലപ്പെടുത്തിയ ശേഷം വീട് കൊള്ളയടിച്ചതായി വരുത്തിത്തീർക്കാൻ സാധനങ്ങൾ വലിച്ചുവാരിയിട്ടു. തന്നേയും അക്രമികൾ കെട്ടിയിട്ടതായി പ്രിയങ്ക പോലീസിനോട് കള്ളം പറഞ്ഞു. എന്നാൽ പ്രിയങ്കയുടെ മൊഴികളിലെ വൈരുദ്ധ്യം പോലീസിൽ സംശയമുണ്ടാക്കി. തുടർന്ന് നടത്തിയ പരിശോധനയിൽ കളവുപോയെന്ന് പറഞ്ഞ ആഭരണങ്ങൾ വീട്ടിൽ നിന്ന് തന്നെ കണ്ടെടുത്തു. ഫോൺ രേഖകൾ പരിശോധിച്ചതോടെ കമലേഷുമായുള്ള ബന്ധവും പുറത്തായി. കൊലപാതകം നടത്തിയ ക്വട്ടേഷൻ ഗുണ്ട സുരേന്ദ്ര ഭാട്ടിക്കായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
Summary: The murder of 28-year-old spice trader Devkrishna in Madhya Pradesh’s Dhar has been revealed as a calculated plot by his wife, Priyanka, and her lover, Kamlesh. Priyanka frequently humiliated her husband over his dark skin tone, stating he didn’t deserve her. To remove him from their path, the duo hired a contract killer for ₹1 lakh. Although she initially staged the crime as a robbery, inconsistent statements and mobile data led the police to her confession. Priyanka and Kamlesh have been arrested, while the hitman remains at large.
