തിരുവനന്തപുരം: കേരള നിയമസഭാ തിരഞ്ഞെടുപ്പിന്റെ വോട്ടെടുപ്പ് പൂർത്തിയായതിന് പിന്നാലെ വോട്ടർമാർക്കും തിരഞ്ഞെടുപ്പ് പ്രക്രിയയിൽ പങ്കാളികളായവർക്കും നന്ദി അറിയിച്ച് മുഖ്യമന്ത്രി പിണറായി വിജയൻ (CM Pinarayi Vijayan Facebook Post Election). കടുത്ത വേനൽച്ചൂടും പ്രതികൂല കാലാവസ്ഥയും അവഗണിച്ച് ബൂത്തുകളിലെത്തിയ ജനങ്ങൾ കേരളത്തിന്റെ ഉയർന്ന ജനാധിപത്യ ബോധമാണ് പ്രകടിപ്പിച്ചതെന്ന് അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
സമ്മതിദാനാവകാശം വിനിയോഗിച്ച മുഴുവൻ വോട്ടർമാർക്കും ഹൃദയം നിറഞ്ഞ നന്ദിയും അഭിവാദ്യങ്ങളും മുഖ്യമന്ത്രി രേഖപ്പെടുത്തി. നാടിനോടുള്ള പ്രതിബദ്ധതയുടെ തെളിവാണ് ഈ ജനപങ്കാളിത്തമെന്ന് അദ്ദേഹം പറഞ്ഞു. ചുരുങ്ങിയ പ്രചാരണ കാലയളവിനുള്ളിലും ചൂട് അവഗണിച്ച് ആവേശത്തോടെ പ്രവർത്തിച്ച രാഷ്ട്രീയ പ്രവർത്തകരെ അദ്ദേഹം പ്രത്യേകം അഭിനന്ദിച്ചു.
സംസ്ഥാനത്ത് എവിടെയും വലിയ അനിഷ്ട സംഭവങ്ങളില്ലാതെ വോട്ടെടുപ്പ് പൂർത്തിയാക്കാൻ കഴിഞ്ഞത് വലിയ നേട്ടമാണെന്ന് മുഖ്യമന്ത്രി വിലയിരുത്തി. തിരഞ്ഞെടുപ്പ് ഡ്യൂട്ടിയിലുണ്ടായിരുന്ന ഉദ്യോഗസ്ഥർ, പോലീസ്, കേന്ദ്രസേന, ആരോഗ്യപ്രവർത്തകർ, സന്നദ്ധ പ്രവർത്തകർ എന്നിവരുടെ സേവനത്തെ മുഖ്യമന്ത്രി പ്രകീർത്തിച്ചു.
“നവകേരളത്തിനായി നമുക്ക് ഒരുമിച്ച് മുന്നേറാം” എന്ന് ആഹ്വാനം ചെയ്തുകൊണ്ടാണ് മുഖ്യമന്ത്രി തന്റെ കുറിപ്പ് അവസാനിപ്പിച്ചത്.
അതേസമയം , വോട്ടെടുപ്പ് പൂർത്തിയായതോടെ ഇനി മെയ് നാലിന് നടക്കുന്ന വോട്ടെണ്ണലിനായുള്ള കാത്തിരിപ്പിലാണ് മുന്നണികളും ജനങ്ങളും.
Story Summary:
Following the conclusion of the 2026 Kerala Assembly election polling, Chief Minister Pinarayi Vijayan extended his gratitude to the voters and officials. In a Facebook post, he highlighted that the high voter turnout despite the scorching heat is a testament to Kerala’s strong democratic values. He also commended political workers, election officials, and security forces for ensuring a peaceful polling process across the state.
