കൊച്ചി: കുന്നത്തുനാട് രാഷ്ട്രീയത്തിൽ അപ്രതീക്ഷിത ട്വിസ്റ്റ്. ട്വന്റി 20 ഭരിക്കുന്ന പൂതൃക്ക പഞ്ചായത്ത് പ്രസിഡന്റ് പൂജ ജോമോൻ സ്ഥാനവും പാർട്ടി അംഗത്വവും രാജിവെച്ചു (Poothrikka Panchayat President Resignation). എന്നാൽ ഈ രാജിക്ക് പിന്നിൽ കോൺഗ്രസ് നടത്തിയ വൻ സാമ്പത്തിക ഇടപാടാണെന്ന് ട്വന്റി 20 ചീഫ് കോർഡിനേറ്റർ സാബു എം. ജേക്കബ് വാർത്താസമ്മേളനത്തിൽ ആരോപിച്ചു. കോൺഗ്രസ് സ്ഥാനാർത്ഥി വി.പി. സജീന്ദ്രന്റെ നേതൃത്വത്തിൽ 20 ലക്ഷം രൂപയുടെ ഡീലാണ് നടന്നതെന്ന് സാബു ജേക്കബ് പറഞ്ഞു. പൂജ ജോമോന്റെ പേരിൽ സഹകരണ ബാങ്കിലുള്ള 7 ലക്ഷം രൂപയുടെ ലോൺ തിരിച്ചടക്കാമെന്നും പുറമെ പണം നൽകുമെന്നുമാണ് കോൺഗ്രസ് വാഗ്ദാനം ചെയ്തതെന്ന് അദ്ദേഹം ആരോപിച്ചു.
മാർച്ച് 27-ന് കോലഞ്ചേരി ജംഗ്ഷനിൽ വെച്ച് വി.പി. സജീന്ദ്രന്റെ കാറിൽ പൂജ കയറിയെന്നും ഇതിന് പിന്നിൽ ഡിസിസി സെക്രട്ടറി സി.പി. ജോയ് ഉണ്ടായിരുന്നുവെന്നും സാബു പറഞ്ഞു. രാജി വെളിപ്പെടുത്തുന്ന ഒരു ഓഡിയോ ക്ലിപ്പും അദ്ദേഹം വാർത്താസമ്മേളനത്തിൽ കേൾപ്പിച്ചു.
അതേസമയം , ട്വന്റി 20 എൻഡിഎ (NDA) മുന്നണിയുടെ ഭാഗമായതിലുള്ള പ്രതിഷേധമാണ് തന്റെ രാജിക്ക് പിന്നിലെന്ന് പൂജ ജോമോൻ വ്യക്തമാക്കി. എൻഡിഎ പ്രവേശനത്തെ തന്റെ ആദർശങ്ങൾക്ക് വിരുദ്ധമായി കാണുന്നുവെന്നും അതുകൊണ്ട് പാർട്ടിയിൽ തുടരാൻ കഴിയില്ലെന്നും പൂജ പറഞ്ഞു. താൻ രാജി പ്രഖ്യാപിച്ചതിന് പിന്നാലെ സാബു ജേക്കബ് ഫോണിൽ വിളിച്ച് ഭീഷണിപ്പെടുത്തിയെന്നും പൂജ ആരോപിച്ചു. മുൻപ് രാജി വെച്ച ഒരു മെമ്പറുടെ മരണം സൂചിപ്പിച്ചായിരുന്നു ഭീഷണിയെന്നും അവർ കൂട്ടിച്ചേർത്തു.
എൻഡിഎ പ്രവേശനത്തെ തുടർന്ന് പാർട്ടിയിൽ നിന്ന് പ്രമുഖർ രാജിവെച്ച സാഹചര്യത്തിൽ സിനിമാ-റിയാലിറ്റി ഷോ താരങ്ങളെയാണ് ഇത്തവണ ട്വന്റി 20 തിരഞ്ഞെടുപ്പിൽ അണിനിരത്തുന്നത്.
സംവിധായകൻ അഖിൽ മാരാർ, നടി അഞ്ജലി നായർ തുടങ്ങിയവർ ട്വന്റി 20 സ്ഥാനാർത്ഥികളായി മത്സരിക്കും. ലക്ഷ്മിപ്രിയ, വീണ നായർ എന്നിവർക്ക് മണ്ഡലത്തിൽ വോട്ടില്ലാത്തതിനാൽ അവസാന നിമിഷം മാറ്റുകയായിരുന്നു.
തിരഞ്ഞെടുപ്പിന് തൊട്ടുമുൻപുള്ള ഈ രാഷ്ട്രീയ പോര് കുന്നത്തുനാട് മണ്ഡലത്തിൽ ട്വന്റി 20-യും കോൺഗ്രസും തമ്മിലുള്ള പോരാട്ടം കൂടുതൽ കടുപ്പിച്ചിരിക്കുകയാണ്.
Story Summary:
Pooja Jomon, the President of Poothrikka Panchayat, resigned from her post and Twenty20 membership citing ideological differences after the party joined the NDA. However, Twenty20 Chief Coordinator Sabu M. Jacob alleged that the resignation was part of a ₹20 lakh deal orchestrated by Congress candidate V.P. Sajeendran. Sabu claimed that Congress offered to settle Pooja’s loans and pay her cash to destabilize the party. Meanwhile, Pooja alleged that Sabu Jacob threatened her following her decision to quit.
