തൃശൂർ: കുന്നംകുളം പട്ടാമ്പി റോഡിൽ ഓടിക്കൊണ്ടിരുന്ന കെഎസ്ആർടിസി ബസിന് തീപിടിച്ചു (KSRTC Bus Fire Kunnamkulam). ഞായറാഴ്ച വൈകുന്നേരം പറേംപാടം വിക്ടറി ബാറിന് സമീപമായിരുന്നു സംഭവം. ബസിലുണ്ടായിരുന്ന യാത്രക്കാരും ജീവനക്കാരും കൃത്യസമയത്ത് പുറത്തിറങ്ങിയതിനാൽ വലിയൊരു ദുരന്തം ഒഴിവായി. ആർക്കും പരുക്കേറ്റതായി റിപ്പോർട്ടുകളില്ല.
കെഎസ്ആർടിസിയുടെ അഡീഷണൽ സർവീസ് ആയിരുന്ന ബസിലാണ് തീപിടിത്തമുണ്ടായത്. സംഭവസമയത്ത് കുറച്ച് യാത്രക്കാർ മാത്രമാണ് ബസിനുള്ളിൽ ഉണ്ടായിരുന്നത്. പുകയും തീയും ശ്രദ്ധയിൽപ്പെട്ട ഉടൻ തന്നെ ബസ് നിർത്തി യാത്രക്കാരെ സുരക്ഷിതമായി പുറത്തിറക്കാൻ ജീവനക്കാർക്ക് സാധിച്ചു. ബസ് ജീവനക്കാർ ഉടൻ തന്നെ അഗ്നിരക്ഷാസേനയെ വിവരം അറിയിക്കുകയും അവർ സ്ഥലത്തെത്തി തീ പൂർണ്ണമായും അണയ്ക്കുകയും ചെയ്തു.
ബസിലെ ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തെത്തുടർന്ന് പട്ടാമ്പി റോഡിൽ അൽപ്പസമയം ഗതാഗത തടസ്സമുണ്ടായി. ബസിന്റെ മുൻഭാഗത്തിനാണ് പ്രധാനമായും കേടുപാടുകൾ സംഭവിച്ചത്. സംഭവത്തിൽ കെഎസ്ആർടിസി അധികൃതർ വിശദമായ പരിശോധന നടത്തുമെന്ന് അറിയിച്ചു.
Summary: A KSRTC additional service bus caught fire on the Kunnamkulam-Pattambi road near Parempadam on Sunday evening. Fortunately, the few passengers on board and the crew escaped unhurt as they evacuated the vehicle immediately. Fire and rescue services arrived promptly to extinguish the flames. A short circuit is suspected to be the cause of the fire.
