ന്യൂഡൽഹി: വടക്കുപടിഞ്ഞാറൻ ഡൽഹിയിൽ 20 വയസ്സുകാരനെ കുത്തിക്കൊന്ന ശേഷം കൊലപാതക വിവരം ഇൻസ്റ്റാഗ്രാമിലൂടെ ആഘോഷമാക്കി 18-കാരൻ (Delhi Teen Instagram Murder Video). നിതേഷ് എന്ന യുവാവിനെയാണ് കരൺ കുമാറും കൂട്ടാളികളും ചേർന്ന് കൊലപ്പെടുത്തിയത്. കൊലപാതകത്തിന് തൊട്ടുപിന്നാലെ ഇൻസ്റ്റാഗ്രാം സ്റ്റോറിയിലൂടെയാണ് കരൺ തന്റെ 1,500 ഓളം വരുന്ന ഫോളോവേഴ്സിനോട് ഈ വിവരം വിളിച്ചുപറഞ്ഞത്.
“ഇപ്പോൾ സമയം രാത്രി 11.22. നിങ്ങളുടെ സഹോദരൻ ഒരു കൊലപാതകം ചെയ്തിരിക്കുന്നു. ഞാൻ കുറച്ചു ദിവസത്തേക്ക് അകത്തേക്ക് (ജയിലിലേക്ക്) പോവുകയാണ്. അതുകൊണ്ട് എല്ലാ സഹോദരങ്ങളും സ്നേഹം നൽകണം,” എന്നായിരുന്നു വീഡിയോയിൽ ഇയാൾ പറഞ്ഞത്. ‘villain_dad_ok_109’ എന്ന ഇൻസ്റ്റാഗ്രാം ഹാൻഡിലിലൂടെ സ്വയം ഒരു ഫോട്ടോഗ്രാഫറായാണ് ഇയാൾ പരിചയപ്പെടുത്തിയിരുന്നത്.
ഷാലിമാർ ബാഗ് പോലീസ് സ്റ്റേഷൻ പരിധിയിൽ വെച്ചുണ്ടായ തർക്കമാണ് കൊലപാതകത്തിൽ കലാശിച്ചത്. പ്രതിയായ കരണും സുഹൃത്ത് മോണ്ടിയും (22) പ്രായപൂർത്തിയാകാത്ത മറ്റൊരു കുട്ടിയും ചേർന്ന് നിതേഷിനെ ക്രൂരമായി മർദ്ദിക്കുകയും കത്തികൊണ്ട് പലതവണ കുത്തുകയുമായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും നിതേഷ് നേരത്തെ തന്നെ മരിച്ചിരുന്നതായി ഡോക്ടർമാർ സ്ഥിരീകരിച്ചു.
സാങ്കേതിക നിരീക്ഷണത്തിന്റെയും രഹസ്യവിവരത്തിന്റെയും അടിസ്ഥാനത്തിൽ വെറും നാല് മണിക്കൂറിനുള്ളിൽ മൂന്ന് പ്രതികളെയും ഡൽഹി പോലീസ് പിടികൂടി. പ്രതികൾ കുറ്റം സമ്മതിച്ചിട്ടുണ്ട്. ഇൻസ്റ്റാഗ്രാമിൽ ഇത്തരത്തിൽ കുറ്റകൃത്യങ്ങൾ ആഘോഷിക്കുന്നത് യുവാക്കൾക്കിടയിൽ വർദ്ധിച്ചുവരുന്ന ക്രിമിനൽ പ്രവണതയുടെ ആഴം വ്യക്തമാക്കുന്നുവെന്ന് പോലീസ് നിരീക്ഷിച്ചു.
Summary: An 18-year-old in North West Delhi, Karan Kumar, stabbed a 20-year-old man named Nitesh to death and then bragged about the crime on Instagram. In a video posted shortly after the incident, Kumar informed his followers that he had committed a murder and would be going to jail, asking for their “love.”
