ടെഹ്റാൻ: പശ്ചിമേഷ്യൻ യുദ്ധം തുടരവേ, അമേരിക്ക മുന്നോട്ടുവെച്ച ഹ്രസ്വകാല വെടിനിർത്തൽ നിർദ്ദേശം ഇറാൻ തള്ളി. 48 മണിക്കൂർ നേരത്തേക്ക് സൈനിക നടപടികൾ നിർത്തിവെക്കാനായിരുന്നു അമേരിക്കയുടെ ആവശ്യം. ഒരു മധ്യസ്ഥ രാജ്യം വഴി ബുധനാഴ്ചയാണ് ഈ നിർദ്ദേശം കൈമാറിയതെന്ന് ഇറാന്റെ ഔദ്യോഗിക വാർത്താ ഏജൻസി റിപ്പോർട്ട് ചെയ്തു.(Iran rejects US 48-hour ceasefire proposal, Mediation efforts fail)
വെടിനിർത്തൽ ചർച്ചകൾക്കിടെയും മേഖലയിൽ സംഘർഷം അതിരൂക്ഷമായി തുടരുകയാണ്. വെള്ളിയാഴ്ച ഹോർമുസ് കടലിടുക്കിന് സമീപം അമേരിക്കയുടെ എ-10 വാർതോഗ് എന്ന യുദ്ധവിമാനം കൂടി ഇറാൻ വെടിവെച്ചിട്ടു. ഈ ആഴ്ച ഇറാൻ തകർക്കുന്ന രണ്ടാമത്തെ അമേരിക്കൻ വിമാനമാണിത്. നേരത്തെ ഒരു എഫ്-15 വിമാനവും ഇറാൻ തകർത്തിരുന്നു. വിമാനം വെടിവെച്ചിട്ട കാര്യം ഇറാൻ സൈന്യം സ്ഥിരീകരിക്കുകയും അമേരിക്കൻ ഉദ്യോഗസ്ഥർ അത് ശരിവെക്കുകയും ചെയ്തിട്ടുണ്ട്.
സംഘർഷം ലഘൂകരിക്കാൻ പാകിസ്ഥാൻ ഉൾപ്പെടെയുള്ള രാജ്യങ്ങൾ നടത്തുന്ന ശ്രമങ്ങൾ ഇതുവരെ ഫലം കണ്ടിട്ടില്ല. വരും ദിവസങ്ങളിൽ ഇസ്ലാമാബാദിൽ വെച്ച് അമേരിക്കൻ പ്രതിനിധികളുമായി ചർച്ചയ്ക്കില്ലെന്ന് ഇറാൻ മധ്യസ്ഥരെ അറിയിച്ചു. അമേരിക്കയുടെ നിബന്ധനകൾ അംഗീകരിക്കാനാവില്ലെന്ന നിലപാടിലാണ് ടെഹ്റാൻ. ചർച്ചകൾക്കായി തുർക്കിയും ഈജിപ്തും ബദൽ മാർഗ്ഗങ്ങൾ തേടുന്നുണ്ട്. ഖത്തറോ ഇസ്താംബൂളോ ചർച്ചകൾക്കുള്ള വേദിയാക്കാൻ ഇവർ ശ്രമിക്കുന്നുണ്ടെങ്കിലും ഇറാന്റെ കർക്കശ നിലപാട് പ്രതിസന്ധിയുണ്ടാക്കുന്നു. അമേരിക്കയുടെ ആവശ്യങ്ങൾ ‘അംഗീകരിക്കാനാവാത്തത്’ എന്ന് വിശേഷിപ്പിച്ച ഇറാൻ, തങ്ങളുടെ പരമാധികാരത്തിന്മേലുള്ള കടന്നുകയറ്റം അനുവദിക്കില്ലെന്ന് വീണ്ടും വ്യക്തമാക്കി. മേഖലയിലെ സ്ഥിതിഗതികൾ അതീവ ഗുരുതരമായി തുടരുകയാണ്.
