ന്യൂഡൽഹി: രാജ്യസഭയിലെ ഉപനേതാവ് സ്ഥാനത്തുനിന്ന് നീക്കിയ ആം ആദ്മി പാർട്ടി നടപടിയിൽ രൂക്ഷമായ പ്രതികരണവുമായി രാഘവ് ഛദ്ദ എംപി (Raghav Chadha Removed AAP Deputy Leader). പാർലമെന്റിൽ തന്നെ സംസാരിക്കാൻ അനുവദിക്കരുതെന്ന് രാജ്യസഭാ സെക്രട്ടേറിയറ്റിനോട് പാർട്ടി ആവശ്യപ്പെട്ടതിന് പിന്നാലെയാണ് ‘നിശബ്ദനാക്കപ്പെട്ടവർ, പക്ഷേ തോൽപ്പിക്കപ്പെട്ടവരല്ല’ എന്ന സന്ദേശവുമായി അദ്ദേഹം രംഗത്തെത്തിയത്. താൻ പാർലമെന്റിൽ ഉന്നയിച്ച ജനകീയ വിഷയങ്ങളുടെ വീഡിയോ ദൃശ്യങ്ങൾ പങ്കുവെച്ചുകൊണ്ടാണ് ഛദ്ദ തന്റെ നിലപാട് വ്യക്തമാക്കിയത്.
പാർലമെന്റിൽ ജനങ്ങളുടെ പ്രശ്നങ്ങൾ ഉന്നയിക്കുന്നത് ഒരു കുറ്റമാണോ എന്നും താൻ എന്തെങ്കിലും തെറ്റ് ചെയ്തിട്ടുണ്ടോ എന്നും അദ്ദേഹം വീഡിയോ സന്ദേശത്തിലൂടെ ചോദിച്ചു. സാധാരണയായി ആരും ചർച്ച ചെയ്യാത്ത ഗൗരവകരമായ വിഷയങ്ങളാണ് താൻ സഭയിൽ ഉന്നയിക്കാറുള്ളതെന്നും ഇതിന്റെ പേരിലാണോ തന്നെ സംസാരിക്കുന്നതിൽ നിന്ന് വിലക്കുന്നതെന്നും അദ്ദേഹം ചോദിച്ചു. പാർട്ടി തന്നെ ഉപനേതാവ് സ്ഥാനത്തുനിന്ന് നീക്കിയത് തനിക്ക് സംസാരിക്കാൻ സമയം അനുവദിക്കാതിരിക്കാനാണെന്നാണ് ഛദ്ദയുമായി അടുത്ത വൃത്തങ്ങൾ സൂചിപ്പിക്കുന്നത്.
— Raghav Chadha (@raghav_chadha) April 2, 2026
അരവിന്ദ് കെജ്രിവാളിന്റെ വിശ്വസ്തനായി അറിയപ്പെട്ടിരുന്ന രാഘവ് ഛദ്ദയെ പെട്ടെന്ന് മാറ്റിനിർത്തിയത് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്. മദ്യനയക്കേസിൽ കെജ്രിവാളിനും മനീഷ് സിസോദിയയ്ക്കും കോടതി ക്ലീൻ ചിറ്റ് നൽകിയ വേളയിലും പാർട്ടിയുടെ മറ്റ് പ്രധാന പ്രവർത്തനങ്ങളിലും ഛദ്ദയുടെ അസാന്നിധ്യം ശ്രദ്ധിക്കപ്പെട്ടിരുന്നു. 2012-ൽ പാർട്ടി രൂപീകരിച്ച കാലം മുതൽ എഎപിക്കൊപ്പമുള്ള ഛദ്ദയെ മാറ്റി പഞ്ചാബിൽ നിന്നുള്ള മറ്റൊരു എംപിയായ അശോക് മിത്തലിനെയാണ് പകരം ഉപനേതാവാക്കിയത്.
വിമാനത്താവളങ്ങളിലെ ഭക്ഷണ സാധനങ്ങളുടെ അമിതവില, ഗിഗ് തൊഴിലാളികളുടെ അവകാശങ്ങൾ, നഗരങ്ങളിലെ ഗതാഗതക്കുരുക്ക് തുടങ്ങിയ വിഷയങ്ങളിൽ ഛദ്ദ രാജ്യസഭയിൽ നടത്തിയ ഇടപെടലുകൾ ശ്രദ്ധേയമായിരുന്നു. തന്നെ നീക്കിയ വാർത്ത പുറത്തുവന്നതിന് തൊട്ടുപിന്നാലെ ഈ ഇടപെടലുകളുടെ ഹൈലൈറ്റ് വീഡിയോ അദ്ദേഹം എക്സിൽ പങ്കുവെച്ചിരുന്നു. പാർട്ടിയുടെ പേരോ കെജ്രിവാളിന്റെ ചിത്രമോ ഇല്ലാതെയായിരുന്നു ഈ വീഡിയോ പോസ്റ്റ് ചെയ്തത് എന്നത് ഛദ്ദയും പാർട്ടിയും തമ്മിലുള്ള അകൽച്ച വർദ്ധിക്കുന്നതിന്റെ സൂചനയാണെന്ന് വിലയിരുത്തപ്പെടുന്നു.
Summary: Raghav Chadha hit back at the Aam Aadmi Party after being dropped as its Deputy Leader in the Rajya Sabha, claiming the move was intended to silence his voice in Parliament. In a video message, he questioned if raising public issues like high food prices and labor rights was a crime. The party has replaced the 37-year-old leader with Punjab MP Ashok Mittal, sparking intense speculation about Chadha’s future within the AAP leadership.
