കൊച്ചി: ഇന്ത്യ ലോകത്തിലെ രണ്ടാമത്തെ വലിയ ടെലികോം വിപണിയായി മാറിയിരിക്കുകയാണെന്ന് കെഫോൺ പ്രിൻസിപ്പൽ സെക്രട്ടറിയും മാനേജിങ് ഡയറക്ടറുമായ ഡോ. സന്തോഷ് ബാബു ഐ.എ.എസ് (റിട്ട.) പ്രസ്താവിച്ചു. 1.2 ബില്യണിലധികം ടെലികോം ഉപഭോക്താക്കളും ഏകദേശം ഒരു ബില്യൺ ഇന്റർനെറ്റ് ഉപയോക്താക്കളുമുള്ള ഇന്ത്യയുടെ നേട്ടം രാജ്യത്തിന്റെ ഡിജിറ്റൽ മുന്നേറ്റത്തിന്റെ തെളിവാണെന്നും അദ്ദേഹം കൂട്ടിച്ചേർത്തു.
ഡാറ്റ ഉപഭോഗം വർധിക്കുന്നതും ക്ലൗഡ് സാങ്കേതികവിദ്യയുടെ കടന്നുകയറ്റവും ഡിജിറ്റൽ പബ്ലിക് പ്ലാറ്റ്ഫോമുകളുടെ വികസനവും ഐടി സേവന മേഖലയെ അതിവേഗം വളർത്തുന്നു. രാജ്യത്തുടനീളം 5ജി ശൃംഖലകൾ വ്യാപിക്കുന്നത് ഈ മുന്നേറ്റത്തിന് ആക്കം കൂട്ടുന്നു.
വരാനിരിക്കുന്ന കേന്ദ്ര ബജറ്റിൽ ഐടി, ടെലികോം മേഖലകൾക്ക് വലിയ പിന്തുണ ലഭിക്കുമെന്നാണ് പ്രതീക്ഷ. ഫൈബർ അധിഷ്ഠിത ബ്രോഡ്ബാൻഡ് വ്യാപനത്തിനും ഡിജിറ്റൽ അടിസ്ഥാനസൗകര്യ വികസനത്തിനും കൂടുതൽ നിക്ഷേപം ബജറ്റിലുണ്ടാകുമെന്ന് കരുതപ്പെടുന്നു-അദ്ദേഹം പറഞ്ഞു.
സേവന ലഭ്യത കുറഞ്ഞ പ്രദേശങ്ങളിലും ഗ്രാമങ്ങളിലും ‘ലാസ്റ്റ്-മൈൽ കണക്ടിവിറ്റി’ (Last-mile connectivity) ഉറപ്പാക്കുന്നത് ഡിജിറ്റൽ അന്തരം കുറയ്ക്കാൻ സഹായിക്കും.ശക്തമായ പബ്ലിക് ഡിജിറ്റൽ ഇൻഫ്രാസ്ട്രക്ചർ രൂപീകരിക്കുന്നത് ഭരണസംവിധാനം മെച്ചപ്പെടുത്തുന്നതിനും സാധാരണക്കാർക്ക് കുറഞ്ഞ ചെലവിൽ വിശ്വസനീയമായ ഇന്റർനെറ്റ് ലഭ്യമാക്കുന്നതിനും വഴിയൊരുക്കും.
കേരളത്തിന്റെ സ്വന്തം ഇന്റർനെറ്റ് പദ്ധതിയെന്ന നിലയിൽ കെഫോണിനും (KFON) ഇത്തരം ദേശീയ നയങ്ങൾ വലിയ കരുത്താകുമെന്നാണ് വിലയിരുത്തപ്പെടുന്നതെന്നും അദ്ദേഹം കൂട്ടിച്ചേർത്തു.
