മാലഗ: ഒരു സിനിമയിലെ കോമഡി രംഗം പോലെ തോന്നിപ്പിക്കുന്ന കവർച്ചാ ശ്രമമാണ് സ്പെയിനിലെ ഒരു ബാറിൽ അരങ്ങേറിയത്. കയ്യിൽ മാരകമായ കത്തിയുമായി പണം ആവശ്യപ്പെട്ടെത്തിയ കവർച്ചക്കാരനെ കണ്ട് ഭയപ്പെടുന്നതിന് പകരം ബാർ ജീവനക്കാർ ചിരിച്ചുതള്ളുകയായിരുന്നു. (Spain Bar Robbery Laughter) സ്പെയിനിലെ മാലഗയിലുള്ള ‘ലാ ബരാക്ക ഡി ലാ അബുവേല’ എന്ന ബാറിലാണ് ഈ വിചിത്ര സംഭവം നടന്നത്.
ബാറിൽ അതിക്രമിച്ചു കയറിയ ആൾ കത്തി വീശി പണം ആവശ്യപ്പെട്ടെങ്കിലും, തങ്ങളെ പറ്റിക്കാൻ വന്ന ഏതെങ്കിലും സുഹൃത്തായിരിക്കും ഇതെന്നാണ് ജീവനക്കാർ കരുതിയത്. ഒരാൾ അയാളുടെ കയ്യിലുണ്ടായിരുന്ന ആയുധം വാങ്ങി നോക്കി ഇതൊരു കളിപ്പാട്ടമാണോ എന്ന് തമാശയായി ചോദിക്കുകയും ചെയ്തു. കവർച്ചക്കാരൻ വീണ്ടും ആക്രോശിച്ചെങ്കിലും ജീവനക്കാർക്ക് അതൊരു തമാശയായി മാത്രമേ തോന്നിയുള്ളൂ. തന്റെ ശ്രമം പരാജയപ്പെടുന്നത് കണ്ടപ്പോൾ അയാൾ ഒരു തോക്ക് പുറത്തെടുത്ത് കൗണ്ടറിൽ അടിച്ചെങ്കിലും ആരും ഗൗരവമായി എടുത്തില്ല.
ഒടുവിൽ ആയുധം ഒരു ജീവനക്കാരന്റെ കഴുത്തിൽ വെച്ചപ്പോൾ, ഈ കത്തിക്ക് ഒട്ടും മൂർച്ചയില്ലല്ലോ എന്നായിരുന്നു അദ്ദേഹത്തിന്റെ പ്രതികരണം. താൻ പൂർണ്ണമായും അവഗണിക്കപ്പെടുന്നു എന്ന് മനസ്സിലാക്കിയ കവർച്ചക്കാരൻ നിരാശയോടെ ബാറിൽ നിന്ന് ഇറങ്ങിപ്പോയി. പിന്നീട് പ്രദേശത്തെ മറ്റ് കടകളിലും ഇയാൾ ഇത്തരത്തിൽ ആക്രമണം നടത്തിയെന്ന് അറിഞ്ഞപ്പോഴാണ് തങ്ങൾ നേരിട്ടത് യഥാർത്ഥ കവർച്ചക്കാരനെയായിരുന്നു എന്ന് ജീവനക്കാർ ഞെട്ടലോടെ തിരിച്ചറിഞ്ഞത്. മറ്റൊരു സ്ഥലത്ത് വെച്ചുണ്ടായ തർക്കത്തെത്തുടർന്ന് ഇയാളെ പിന്നീട് പോലീസ് അറസ്റ്റ് ചെയ്തു.
