ചെന്നൈ: തമിഴ്നാട് നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക മുഖ്യമന്ത്രി എം.കെ. സ്റ്റാലിനും തമിഴക വെട്രി കഴകം (ടിവികെ) അധ്യക്ഷൻ വിജയിയും സമർപ്പിച്ചു (Tamil Nadu Election 2026). ഏപ്രിൽ 23-നാണ് സംസ്ഥാനത്ത് വോട്ടെടുപ്പ് നടക്കുന്നത്. തന്റെ തട്ടകമായ കൊളത്തൂർ മണ്ഡലത്തിൽ നിന്നാണ് ഡി.എം.കെ അധ്യക്ഷൻ സ്റ്റാലിൻ ജനവിധി തേടുന്നത്. 2011 മുതൽ തുടർച്ചയായി മൂന്ന് തവണ അദ്ദേഹം ഈ മണ്ഡലത്തെയാണ് പ്രതിനിധീകരിക്കുന്നത്.
തമിഴ് രാഷ്ട്രീയത്തിലെ പുതിയ ശക്തിയായി വിശേഷിപ്പിക്കപ്പെടുന്ന നടൻ വിജയ് തന്റെ ആദ്യ തിരഞ്ഞെടുപ്പ് പോരാട്ടത്തിനായി രണ്ട് മണ്ഡലങ്ങളാണ് തിരഞ്ഞെടുത്തത്. ചെന്നൈയിലെ പെരമ്പൂർ, തിരുച്ചി ഈസ്റ്റ് എന്നീ നഗര മണ്ഡലങ്ങളിൽ നിന്നാണ് വിജയ് മത്സരിക്കുന്നത്. വ്യാസർപാടിയിലെ ഡോ. അംബേദ്കർ ഗവൺമെന്റ് ആർട്സ് കോളേജിലെത്തിയാണ് വിജയ് പത്രിക നൽകിയത്. ആയിരക്കണക്കിന് ആരാധകരും പാർട്ടി പ്രവർത്തകരും അദ്ദേഹത്തെ വരവേൽക്കാൻ എത്തിയിരുന്നു.
നാമനിർദ്ദേശ പത്രിക സമർപ്പിച്ച ശേഷം നടത്തിയ റോഡ് ഷോയിൽ വൻ വിജയപ്രതീക്ഷയാണ് സ്റ്റാലിൻ പങ്കുവെച്ചത്. ഇത്തവണത്തെ വിജയം ചരിത്രപരമായിരിക്കുമെന്നും അദ്ദേഹം പറഞ്ഞു. ഡി.എം.കെ സഖ്യത്തിൽ കോൺഗ്രസ് (28), വി.സി.കെ (8), സി.പി.ഐ (5), സി.പി.എം (5) തുടങ്ങിയ കക്ഷികളാണുള്ളത്. അതേസമയം, തന്റെ ‘മക്കൾ സഖ്യം’ സ്റ്റാലിന്റെ നേതൃത്വത്തിലുള്ള സഖ്യത്തിന് കനത്ത വെല്ലുവിളി ഉയർത്തുമെന്ന് വിജയ് പ്രഖ്യാപിച്ചു. യുവാക്കളുടെയും ‘വിസിൽ’ അടയാളത്തിന്റെയും പിന്തുണയോടെ മാറ്റം കൊണ്ടുവരുമെന്നും അദ്ദേഹം പറഞ്ഞു.
Summary: Tamil Nadu CM MK Stalin and TVK chief Vijay filed their nominations on Monday for the upcoming Assembly elections scheduled for April 23. Stalin is contesting from his stronghold, Kolathur, while Vijay is making his electoral debut from two seats: Perambur and Tiruchi East.
