ടെഹ്റാൻ: അമേരിക്കയും സഖ്യകക്ഷികളും സൈനിക സമ്മർദ്ദം ശക്തമാക്കിയാൽ തന്ത്രപ്രധാനമായ ബാബ് അൽ മാൻഡേബ് കടലിടുക്ക് ഉപരോധിക്കുമെന്ന് ഇറാന്റെ ഭീഷണി. ഹോർമുസ് കടലിടുക്കിന് മേൽ നിയന്ത്രണം സ്ഥാപിക്കാനുള്ള അമേരിക്കൻ നീക്കങ്ങൾക്കുള്ള മറുപടിയായാണ് ഇറാൻ സൈനിക വൃത്തങ്ങൾ ഈ മുന്നറിയിപ്പ് നൽകിയത്. പേർഷ്യൻ ഗൾഫിലോ ഒമാൻ കടലിലോ ഇറാന്റെ ദ്വീപുകളിലോ സൈനിക വിന്യാസം നടത്തിയാൽ ശത്രുക്കൾക്ക് അപ്രതീക്ഷിതമായ തിരിച്ചടി നേരിടേണ്ടി വരുമെന്നും ഇറാൻ വക്താവ് വ്യക്തമാക്കി.(Iran has threatened to block the Bab al-Mandeb Strait If US Escalates War)
ഇന്ത്യൻ മഹാസമുദ്രത്തെ ചെങ്കടലുമായും സൂയസ് കനാലുമായും ബന്ധിപ്പിക്കുന്ന ഏക പാതയാണിത്. ഇതിന്റെ ഉപരോധം ആഗോള സമ്പദ്വ്യവസ്ഥയെ രീതിയിൽ ബാധിക്കും. ലോക വ്യാപാരത്തിന്റെ ഏകദേശം 12 ശതമാനത്തോളം നടക്കുന്നത് ഈ ഇടുങ്ങിയ പാതയിലൂടെയാണ്. ഇതിന് തടസ്സം നേരിട്ടാൽ സൂയസ് കനാൽ വഴിയുള്ള ഗതാഗതം പൂർണ്ണമായും സ്തംഭിക്കും.
ലോകത്തെ ആകെ എണ്ണ വ്യാപാരത്തിന്റെ 12 ശതമാനവും എൽഎൻജി വ്യാപാരത്തിന്റെ 8 ശതമാനവും ഈ റൂട്ട് വഴിയാണ്. ഗൾഫ് രാജ്യങ്ങളിൽ നിന്നുള്ള ഇന്ധനം യൂറോപ്പിലേക്കും അമേരിക്കയിലേക്കും എത്തുന്ന പ്രധാന പാതയാണിത്. യൂറോപ്പിൽ നിന്നും അമേരിക്കയിൽ നിന്നും ഇന്ത്യയിലേക്കും ചൈനയിലേക്കും വരുന്ന കപ്പലുകൾക്ക് ഈ പാത അനിവാര്യമാണ്.
