യുക്രെയ്നുള്ള രഹസ്യാന്വേഷണ സഹായം അമേരിക്ക അവസാനിപ്പിക്കുകയാണെങ്കിൽ, പകരം ഇറാന് നൽകുന്ന സൈനിക വിവരങ്ങൾ റഷ്യയും നിർത്തലാക്കാമെന്ന് വ്ലാഡിമിർ പുടിൻ വാഗ്ദാനം ചെയ്തെന്ന വാർത്തകൾ മോസ്കോ തള്ളി (Putin Iran Intelligence Deal). കഴിഞ്ഞ ആഴ്ച മയാമിയിൽ നടന്ന കൂടിക്കാഴ്ചയിൽ റഷ്യൻ പ്രതിനിധി കിറിൽ ദിമിത്രീവ്, ട്രംപ് ഭരണകൂടത്തിലെ ഉന്നതരായ സ്റ്റീവ് വിറ്റ്കോഫ്, ജാറെഡ് കുഷ്നർ എന്നിവർക്ക് മുന്നിൽ ഇത്തരമൊരു നിർദ്ദേശം വെച്ചെന്നായിരുന്നു ‘പൊളിറ്റിക്കോ’ റിപ്പോർട്ട് ചെയ്തത്. എന്നാൽ ഈ റിപ്പോർട്ട് പൂർണ്ണമായും വ്യാജമാണെന്ന് ദിമിത്രീവ് പ്രതികരിച്ചു.
യുഎസ്-ഇസ്രായേൽ യുദ്ധത്തിനിടയിൽ മധ്യേഷ്യയിലെ അമേരിക്കൻ യുദ്ധക്കപ്പലുകളുടെയും വിമാനങ്ങളുടെയും രഹസ്യ വിവരങ്ങൾ റഷ്യ ഇറാന് കൈമാറുന്നുണ്ടെന്ന് നേരത്തെ ‘വാഷിംഗ്ടൺ പോസ്റ്റ്’ റിപ്പോർട്ട് ചെയ്തിരുന്നു. ഇതിൽ അമേരിക്കൻ പ്രസിഡന്റ് ഡൊണാൾഡ് ട്രംപ് കടുത്ത അതൃപ്തി പ്രകടിപ്പിക്കുകയും ചെയ്തിരുന്നു. റഷ്യ ഇറാന് വിവരങ്ങൾ നൽകുന്നുണ്ടെങ്കിൽ അത് തടയണമെന്നും അല്ലാത്തപക്ഷം യുക്രെയ്ൻ യുദ്ധത്തിൽ റഷ്യക്ക് തിരിച്ചടി നേരിടേണ്ടി വരുമെന്നുമുള്ള സൂചനകൾ വൈറ്റ് ഹൗസ് നൽകിയിട്ടുണ്ട്. എന്നാൽ ഇറാന് റഷ്യ നൽകുന്ന വിവരങ്ങൾ അവരെ ഒട്ടും സഹായിക്കുന്നില്ലെന്നായിരുന്നു ട്രംപിന്റെ പരിഹാസം.
യുക്രെയ്ൻ യുദ്ധത്തിൽ റഷ്യയുടെ പ്രധാന സഖ്യകക്ഷിയാണ് ഇറാൻ. യുദ്ധത്തിന്റെ പ്രാരംഭ ഘട്ടത്തിൽ ഇറാൻ നിർമ്മിത ഡ്രോണുകൾ റഷ്യ ഉപയോഗിച്ചിരുന്നു. നിലവിൽ റഷ്യ ഇറാന് മാനുഷിക സഹായങ്ങൾ നൽകുന്നുണ്ടെങ്കിലും സൈനികമായ എന്ത് സഹായമാണ് നൽകുന്നതെന്ന കാര്യത്തിൽ പരസ്യ പ്രതികരണം നടത്തിയിട്ടില്ല. അമേരിക്കയും റഷ്യയും തമ്മിലുള്ള സംഘർഷം വർദ്ധിപ്പിക്കാനുള്ള ചില മാധ്യമങ്ങളുടെ ശ്രമമാണ് ഈ വാർത്തയെന്ന് റിപ്പബ്ലിക്കൻ പാർട്ടി അംഗം അന്ന പൗലീന ലൂണയും ആരോപിച്ചു.
Summary
Russia has denied reports claiming it offered to stop sharing intelligence with Iran in exchange for the US ending its intel support to Ukraine.
The Kremlin’s envoy dismissed the claims as “fake” following reports of a high-level meeting between Russian and Trump administration officials.
