കാസർകോട്: മൊഗ്രാൽ പുതൂർ ഒന്നാം ബൂത്ത് ബി.എൽ.ഒയും ചെർക്കള ഗവ. ഹയർ സെക്കണ്ടറി സ്കൂൾ അധ്യാപകനുമായ സവാദ് (32) അന്തരിച്ചു (Kasaragod BLO Death). ശനിയാഴ്ച രാവിലെ മൊഗ്രാൽ കടവത്ത് പുഴയിൽ അവശനിലയിൽ കണ്ടെത്തിയ സവാദിനെ ഉടൻ തന്നെ കാസർകോട് ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തിരഞ്ഞെടുപ്പ് ഡ്യൂട്ടിയുമായി ബന്ധപ്പെട്ട അമിത ജോലി ഭാരമാണ് സവാദിന്റെ മരണത്തിന് കാരണമെന്ന ഗുരുതര ആരോപണവുമായി ബന്ധുക്കളും സുഹൃത്തുക്കളും രംഗത്തെത്തിയിട്ടുണ്ട്.ശനിയാഴ്ച രാവിലെ ഏഴ് മണിയോടെയാണ് സവാദ് വീട്ടിൽ നിന്ന് ഇറങ്ങിയത്. ഏറെ നേരം കഴിഞ്ഞിട്ടും കാണാതിരുന്നതിനെത്തുടർന്ന് നടത്തിയ തിരച്ചിലിലാണ് കടവത്ത് പുഴയിൽ ഇദ്ദേഹത്തെ അവശനിലയിൽ കണ്ടെത്തിയത്.
കഴിഞ്ഞ കുറച്ചു ദിവസങ്ങളായി സവാദ് വലിയ രീതിയിലുള്ള ജോലി സമ്മർദ്ദം അനുഭവിച്ചിരുന്നതായി ബന്ധുക്കൾ പറയുന്നു. ബി.എൽ.ഒ ഡ്യൂട്ടിയുമായി ബന്ധപ്പെട്ട ടാർഗെറ്റുകളും മറ്റ് ഔദ്യോഗിക സമ്മർദ്ദങ്ങളും അദ്ദേഹത്തെ മാനസികമായി തളർത്തിയിരുന്നതായാണ് സൂചന.
ജില്ലാ കളക്ടർ നേരിട്ടെത്തി വിശദീകരണം നൽകാതെ മൃതദേഹം ഏറ്റുവാങ്ങില്ലെന്ന നിലപാടിലാണ് ബന്ധുക്കൾ. ആശുപത്രി പരിസരത്ത് നിലവിൽ വലിയ പ്രതിഷേധമാണ് നടക്കുന്നത്.
തിരഞ്ഞെടുപ്പ് പ്രഖ്യാപിച്ചതിന് പിന്നാലെ ഉദ്യോഗസ്ഥർ അനുഭവിക്കുന്ന ജോലി ഭാരത്തെക്കുറിച്ചുള്ള ചർച്ചകൾക്ക് ഈ സംഭവം വഴിമരുന്നിട്ടിരിക്കുകയാണ്. പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.
Story Summary:
Savad (32), a teacher at Cherkala Govt Higher Secondary School and a Booth Level Officer (BLO) for Mogral Puthur, passed away after being found in a critical state in the Mogral Kadavath river on Saturday morning. Relatives and friends have alleged that extreme work pressure related to election duties led to this tragedy. Protests broke out at Kasaragod General Hospital, with family members refusing to accept the body until the District Collector arrived to address their concerns.
