മുംബൈ: മുംബൈയിലെ അന്ധേരി വെസ്റ്റിൽ പ്രതിമാസം 1.2 ലക്ഷം രൂപ വാടക നൽകുന്ന 3BHK ഫ്ലാറ്റിൽ താമസിക്കുന്ന യുവതിയുടെ വീഡിയോ സോഷ്യൽ മീഡിയയിൽ വലിയ ചർച്ചയാകുന്നു ( Mumbai Woman 1.2 Lakh Rent Andheri West). വ്ലോഗർ ആര്യ കോത്താരിയുടെ ‘റെന്റ് ഇൻ മുംബൈ’ പരമ്പരയുടെ ഭാഗമായി പുറത്തുവന്ന വീഡിയോയിൽ, തന്നെത്തന്നെ ഒരു ‘സ്റ്റേ അറ്റ് ഹോം ഡോട്ടർ’ എന്നാണ് യുവതി വിശേഷിപ്പിക്കുന്നത്. ജോലിക്ക് പോകാതെ ഇത്രയും വലിയ തുക വാടക നൽകുന്നതിനെച്ചൊല്ലി സോഷ്യൽ മീഡിയയിൽ അനുകൂലിച്ചും പ്രതികൂലിച്ചും നിരവധി അഭിപ്രായങ്ങളാണ് ഉയരുന്നത്.
കടൽക്കാഴ്ചയും മുംബൈ മെട്രോയുടെ ദൃശ്യങ്ങളും ആസ്വദിക്കാവുന്ന ഈ ഫ്ലാറ്റിൽ ഒരു സാധാരണ ജോലിയും ഇല്ലാതെയാണ് താൻ കഴിയുന്നതെന്ന് യുവതി പറയുന്നു. തന്റെ ജീവിതം വലിയ ‘പോരാട്ടമാണ്’ എന്ന് യുവതി അവകാശപ്പെട്ടത് തുടക്കത്തിൽ പലരെയും ചൊടിപ്പിച്ചിരുന്നു. എന്നാൽ ഇതിന് പിന്നിലെ യഥാർത്ഥ കാരണം വെളിപ്പെടുത്തിയതോടെ വിമർശകർ പോലും അനുഭാവം പ്രകടിപ്പിച്ചു. സ്കീസോഫ്രീനിയ ബാധിച്ച തന്റെ അമ്മയെ പരിചരിക്കുക എന്നതാണ് തന്റെ പ്രധാന ദൗത്യമെന്നും അതിനുള്ള പ്രതിഫലമാണ് കുടുംബം തനിക്ക് നൽകുന്നതെന്നും യുവതി വ്യക്തമാക്കി. തണുപ്പ് സഹിക്കാൻ കഴിയാത്തതിനാൽ ശീതകാലത്ത് അമ്മയെ പരിചരിക്കാനാണ് മുംബൈയിലെ ചൂടുള്ള കാലാവസ്ഥയിലേക്ക് ഇവർ മാറുന്നത്.
വീഡിയോ ഇതിനോടകം 1.3 ദശലക്ഷത്തിലധികം ആളുകൾ കണ്ടുകഴിഞ്ഞു. മാസം 1.2 ലക്ഷം രൂപ വാടക നൽകുന്ന ഒരാൾ ‘പോരാട്ടം’ എന്ന വാക്ക് ഉപയോഗിക്കുന്നത് ശരിയല്ലെന്ന് ഒരു വിഭാഗം വാദിക്കുന്നു. മുംബൈയിലെ സാധാരണക്കാരുടെ ശമ്പളത്തേക്കാൾ കൂടുതലാണ് ഈ വാടകയെന്നും ഇവർ ചൂണ്ടിക്കാട്ടുന്നു. രോഗിയായ അമ്മയെ പരിചരിക്കുന്നത് ചെറിയ കാര്യമല്ലെന്നും ഒരു മകൾ എന്ന നിലയിൽ അവർ ചെയ്യുന്നത് വലിയ ഉത്തരവാദിത്തമാണെന്നും മറ്റൊരു വിഭാഗം അഭിപ്രായപ്പെടുന്നു. ആഡംബരങ്ങൾക്കിടയിലും കുടുംബത്തെ നോക്കുന്ന മകളെ പലരും അഭിനന്ദിച്ചു.
ഇത്തരമൊരു ഫ്ലാറ്റിൽ സുഖമായി താമസിക്കാൻ മാസം ചുരുങ്ങിയത് 2.5 ലക്ഷം രൂപയെങ്കിലും വരുമാനം വേണമെന്നാണ് യുവതിയുടെ അഭിപ്രായം. ‘സ്റ്റേ അറ്റ് ഹോം ഡോട്ടർ’ എന്ന വാക്കാണ് ഇപ്പോൾ സോഷ്യൽ മീഡിയയിൽ പുതിയ ട്രെൻഡായി മാറിയിരിക്കുന്നത്.
View this post on Instagram
