ന്യൂഡൽഹി: വിമാനങ്ങളിൽ സീറ്റ് തിരഞ്ഞെടുക്കുന്നതിന് യാത്രക്കാരിൽ നിന്ന് അമിത നിരക്ക് ഈടാക്കുന്ന വിമാനക്കമ്പനികളുടെ രീതിക്ക് തടയിട്ട് കേന്ദ്ര സർക്കാർ (Airlines seat selection fee India). ഓരോ വിമാനത്തിലും കുറഞ്ഞത് 60 ശതമാനം സീറ്റുകളെങ്കിലും സീറ്റ് സെലക്ഷൻ ഫീസില്ലാതെ യാത്രക്കാർക്ക് ലഭ്യമാക്കണമെന്ന് കേന്ദ്ര വ്യോമയാന മന്ത്രാലയം കർശന നിർദ്ദേശം നൽകി.
വിൻഡോ സീറ്റുകൾക്കും മുൻനിര സീറ്റുകൾക്കും വലിയ തുക ഈടാക്കുന്നതിനെതിരെ യാത്രക്കാരിൽ നിന്ന് വ്യാപകമായ പരാതി ഉയർന്ന സാഹചര്യത്തിലാണ് പുതിയ നടപടി. ചില വിമാനങ്ങളിൽ ഭൂരിഭാഗം സീറ്റുകളും ‘പെയ്ഡ് സീറ്റുകൾ’ (Paid Seats) ആയി മാറ്റുന്നതിലൂടെ വിമാനക്കമ്പനികൾ ലാഭം വർദ്ധിപ്പിക്കുന്നുവെന്ന കണ്ടെത്തലിനെത്തുടർന്നാണ് നിയന്ത്രണം.
പശ്ചിമേഷ്യൻ സംഘർഷത്തെത്തുടർന്ന് വിമാന ടിക്കറ്റ് നിരക്കുകൾ കുതിച്ചുയരുന്ന സാഹചര്യത്തിൽ, സീറ്റ് സെലക്ഷൻ ഫീസ് ഒഴിവാക്കുന്നത് സാധാരണക്കാരായ യാത്രക്കാർക്ക് വലിയ ആശ്വാസമാകും.പുതിയ നിർദ്ദേശം പ്രാബല്യത്തിൽ വരുന്നതോടെ വിമാനം ബുക്ക് ചെയ്യുന്ന സമയത്ത് ആകെയുള്ള സീറ്റുകളിൽ 60 ശതമാനമെങ്കിലും അധിക പണം നൽകാതെ തന്നെ യാത്രക്കാർക്ക് ഇഷ്ടാനുസരണം തിരഞ്ഞെടുക്കാൻ സാധിക്കും. യാത്രക്കാർക്ക് അധിക സാമ്പത്തിക ബാധ്യതയില്ലാതെ യാത്ര ചെയ്യാനുള്ള സൗകര്യം ഉറപ്പാക്കണമെന്ന് ഡി.ജി.സി.എ (DGCA) നേരത്തെയും വ്യക്തമാക്കിയിരുന്നു. വിമാനക്കമ്പനികളുടെ ‘സീറ്റ് കൊള്ള’യ്ക്ക് പുതിയ നിയന്ത്രണം അറുതി വരുത്തുമെന്നാണ് വിലയിരുത്തൽ.
Story Summary:
The Union Ministry of Civil Aviation has issued a strict directive to airlines, mandating that at least 60% of seats on every flight must be available for selection without any additional fee. This move comes after widespread passenger complaints regarding exorbitant charges for window and front-row seats. Amidst rising airfares due to the West Asia conflict, this regulation aims to reduce the financial burden on travelers and curb the practice of converting most seats into “paid seats” for extra profit.
