വാഷിങ്ടൺ: ലോകത്തെ ഏറ്റവും പ്രധാനപ്പെട്ട കപ്പൽ പാതകളിലൊന്നായ ഹോർമുസ് കടലിടുക്ക് തുറക്കുന്നതിനായി ഇറാനിയൻ മിസൈൽ കേന്ദ്രങ്ങൾക്ക് നേരെ യുഎസ് ശക്തമായ ആക്രമണം നടത്തി. അമേരിക്കയുടെ കൈവശമുള്ള അതിമാരകമായ പെനട്രേറ്റർ ബോംബുകൾ ഉപയോഗിച്ചാണ് ആക്രമണം നടത്തിയതെന്ന് യുഎസ് സൈന്യം സ്ഥിരീകരിച്ചു.(US Hits Iran Missiles Near Hormuz With 5,000-Pound ‘Bunker Buster’ Bombs)
ഇറാന്റെ തീരപ്രദേശത്തുള്ള മിസൈൽ കേന്ദ്രങ്ങളിൽ 5,000 പൗണ്ട് ഭാരമുള്ള ഒന്നിലധികം പെനട്രേറ്റർ ബോംബുകൾ പ്രയോഗിച്ചതായി യുഎസ് സെൻട്രൽ കമാൻഡ് അറിയിച്ചു. അന്താരാഷ്ട്ര കപ്പൽ ഗതാഗതത്തിന് ഭീഷണി ഉയർത്തിയ ഇറാന്റെ കപ്പൽവേധ ക്രൂയിസ് മിസൈലുകൾ നശിപ്പിക്കുകയായിരുന്നു ലക്ഷ്യം. ആക്രമണത്തിൽ ഇറാന്റെ നിരവധി മിസൈലുകളും വിക്ഷേപണ കേന്ദ്രങ്ങളും തകർത്തതായി അമേരിക്ക അവകാശപ്പെട്ടു.
ഹോർമുസ് കടലിടുക്ക് ഇറാൻ അടച്ചതിനെത്തുടർന്ന് ആഗോള എണ്ണ വിതരണം തടസ്സപ്പെട്ട പശ്ചാത്തലത്തിലാണ് പ്രസിഡന്റ് ഡൊണാൾഡ് ട്രംപ് സൈനിക നടപടിക്ക് ഉത്തരവിട്ടത്. എന്നാൽ ഈ നീക്കത്തിൽ നാറ്റോ സഖ്യകക്ഷികളുടെ പിന്തുണ ലഭിക്കാത്തതിൽ ട്രംപ് പരസ്യമായി രോഷം പ്രകടിപ്പിച്ചു. ലോകത്തിന്റെ നന്മയ്ക്കുവേണ്ടിയാണ് ഞാൻ ഈ യുദ്ധം നടത്തുന്നത്. എന്നാൽ എന്റെ ശ്രമങ്ങളെ ആരും വിലമതിക്കുന്നില്ല. നാറ്റോയെ ഇത്രയധികം സഹായിച്ചിട്ടും നിർണ്ണായക ഘട്ടത്തിൽ യുഎസിന് പിന്തുണ ലഭിക്കുന്നില്ല. ഇറാൻ ആണവായുധം നേടുന്നത് തടയേണ്ടത് സഖ്യകക്ഷികളുടെ കൂടി ആവശ്യമാണ്, ട്രംപ് പറഞ്ഞു.
