വാഷിങ്ടൺ: ഹോർമുസ് കടലിടുക്കിലെ സുരക്ഷ ഉറപ്പാക്കാൻ രൂപീകരിച്ച നാവിക സഖ്യത്തിൽ ചേരാൻ വിസമ്മതിച്ച സഖ്യരാജ്യങ്ങളെ പരസ്യമായി വിമർശിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ലോകത്തിലെ ഏറ്റവും കരുത്തുറ്റ സൈന്യം അമേരിക്കയുടേതാണെന്നും ഈ എണ്ണപ്പാത സംരക്ഷിക്കാൻ ആരുടെയും സഹായം തനിക്ക് ആവശ്യമില്ലെന്നും അദ്ദേഹം വ്യക്തമാക്കി. സഖ്യകക്ഷികളുടെ നിഷേധാത്മക നിലപാട് നാറ്റോയുടെ ഭാവിക്ക് ദോഷം ചെയ്യുമെന്നും ട്രംപ് മുന്നറിയിപ്പ് നൽകി.(Trump Says US Doesn’t Need Allies’ Help After He Demanded It and got rejected)
ഹോർമുസ് കടലിടുക്കിലേക്ക് യുദ്ധക്കപ്പലുകൾ വിന്യസിക്കണമെന്ന ട്രംപിന്റെ ആവശ്യം ജർമ്മനി, സ്പെയിൻ, ഇറ്റലി തുടങ്ങിയ രാജ്യങ്ങൾ നിരാകരിച്ചിരുന്നു. സൈനിക നീക്കത്തേക്കാൾ ചർച്ചകളിലൂടെ പ്രശ്നം പരിഹരിക്കാനാണ് ഫ്രാൻസ്, ജപ്പാൻ, ഓസ്ട്രേലിയ തുടങ്ങിയ രാജ്യങ്ങൾ മുൻഗണന നൽകുന്നത്. കൂടുതൽ സൈന്യത്തെ വിന്യസിക്കുന്നത് സംഘർഷം വർദ്ധിപ്പിക്കുമെന്ന് ഇവർ ഭയപ്പെടുന്നു.
യുദ്ധം അവസാനിക്കാറായപ്പോൾ മാത്രം സഹായം വാഗ്ദാനം ചെയ്ത യുകെയുടെ നിലപാടിനെ ട്രംപ് ശക്തമായി വിമർശിച്ചു. സഖ്യകക്ഷികളുടെ വിശ്വസ്തത പരീക്ഷിക്കാനാണ് താൻ സഹായം തേടിയതെന്നും അവരുടെ പ്രതികരണത്തിൽ അതൃപ്തനാണെന്നും അദ്ദേഹം കൂട്ടിച്ചേർത്തു. ഫെബ്രുവരി 28-ന് ആരംഭിച്ച അമേരിക്ക-ഇസ്രയേൽ സൈനിക നടപടിക്ക് പ്രതികാരമായി ഇറാൻ ഹോർമുസ് കടലിടുക്ക് അടച്ചിട്ടിരിക്കുകയാണ്. കടലിടുക്ക് കടക്കാൻ ശ്രമിച്ച 15-ലധികം കപ്പലുകൾക്ക് നേരെ ഇറാൻ ആക്രമണം നടത്തി.
