തിരുവനന്തപുരം: നിയമസഭാ തിരഞ്ഞെടുപ്പ് പ്രഖ്യാപിച്ച് 24 മണിക്കൂർ പിന്നിട്ടിട്ടും കോൺഗ്രസ് സ്ഥാനാർത്ഥി പട്ടിക വൈകുന്നതിനിടയിൽ, സിപിഎമ്മിലെ ആഭ്യന്തര കലഹം മുതലെടുക്കാൻ യുഡിഎഫ് നീക്കം (UDF supports CPIM rebels). മലമ്പുഴ, അമ്പലപ്പുഴ, പയ്യന്നൂർ, തളിപ്പറമ്പ് എന്നീ മണ്ഡലങ്ങളിൽ സിപിഎം വിട്ടുവന്ന പ്രമുഖ നേതാക്കളെ പിന്തുണയ്ക്കാനാണ് യുഡിഎഫ് നേതൃത്വത്തിന്റെ പ്രാഥമിക തീരുമാനം. ഭരണകക്ഷിയിലെ വിള്ളലുകൾ വോട്ടാക്കി മാറ്റാനുള്ള തന്ത്രപരമായ നീക്കമായാണ് രാഷ്ട്രീയ നിരീക്ഷകർ ഇതിനെ കാണുന്നത്.
പ്രധാന മണ്ഡലങ്ങളിലെ യുഡിഎഫ് തന്ത്രം
അമ്പലപ്പുഴയിൽ സിപിഎമ്മിൽ നിന്ന് അകന്ന മുതിർന്ന നേതാവ് ജി. സുധാകരൻ സ്വതന്ത്രനായി മത്സരിക്കുമെന്ന് പ്രഖ്യാപിച്ചതോടെ, അവിടെ സ്ഥാനാർത്ഥിയെ നിർത്താതെ അദ്ദേഹത്തെ പിന്തുണയ്ക്കാനാണ് യുഡിഎഫ് തീരുമാനം. കഴിഞ്ഞ തവണ എം. ലിജു മത്സരിച്ച മണ്ഡലമാണിത്. എച്ച്. സലാമാണ് ഇവിടെ എൽഡിഎഫ് സ്ഥാനാർത്ഥി.
തളിപ്പറമ്പിൽ പി.കെ. ശ്യാമളയുടെ സ്ഥാനാർത്ഥിത്വത്തിൽ പ്രതിഷേധിച്ച് പാർട്ടി വിട്ട ടി.കെ. ഗോവിന്ദനെ പിന്തുണയ്ക്കാൻ യുഡിഎഫ് തീരുമാനിച്ചു. എം.വി. ഗോവിന്ദന്റെ ഭാര്യയായ ശ്യാമളയ്ക്കെതിരെ ഒരു മുതിർന്ന സിപിഎം നേതാവ് തന്നെ രംഗത്തുവരുന്നത് ഗുണകരമാകുമെന്നാണ് കോൺഗ്രസിന്റെ വിലയിരുത്തൽ.
മലമ്പുഴയിൽ വി.എസ്. അച്യുതാനന്ദന്റെ മുൻ പി.എ എ. സുരേഷ് സ്വതന്ത്രനായി മത്സരിക്കുമെന്നാണ് വിവരം. സുരേഷിനെ യുഡിഎഫ് പിന്തുണയ്ക്കും. അദ്ദേഹം കോൺഗ്രസ് ചിഹ്നത്തിൽ മത്സരിക്കാനുള്ള സാധ്യതയും തള്ളിക്കളയാനാവില്ല. സിറ്റിംഗ് എംഎൽഎ എ. പ്രഭാകരനാണ് ഇവിടെ എതിരാളി.
പയ്യന്നൂരിൽ രക്തസാക്ഷി ഫണ്ട് വിവാദത്തിലൂടെ സിപിഎമ്മിൽ നിന്ന് പുറത്തായ വി. കുഞ്ഞികൃഷ്ണനെ പയ്യന്നൂരിൽ ആർഎസ്പി പിന്തുണയ്ക്കും. കാഞ്ഞങ്ങാടിന് പകരം പയ്യന്നൂർ സീറ്റ് ഏറ്റെടുത്താണ് ആർഎസ്പി ഈ നീക്കം നടത്തുന്നത്. ടി.ഐ. മധുസൂദനനാണ് മണ്ഡലത്തിലെ സിപിഎം സ്ഥാനാർത്ഥി.
കോൺഗ്രസ് പട്ടിക വൈകുന്നു; പ്രതിസന്ധിയായി എംപിമാർ
സ്ഥാനാർത്ഥി പട്ടിക ഉടൻ പുറത്തിറക്കുമെന്ന് വി.ഡി. സതീശൻ വ്യക്തമാക്കുന്നുണ്ടെങ്കിലും, എംപിമാർ നിയമസഭയിലേക്ക് മത്സരിക്കണമെന്ന ആവശ്യം ഉന്നയിച്ചതാണ് കോൺഗ്രസിനെ പ്രതിസന്ധിയിലാക്കുന്നത്. ആർഎസ്പി ഒഴികെയുള്ള മറ്റ് ഘടകകക്ഷികളും സ്ഥാനാർത്ഥി പ്രഖ്യാപനത്തിൽ അന്തിമ തീരുമാനമെടുത്തിട്ടില്ല. വിമത നീക്കങ്ങൾ ശക്തമായ മണ്ഡലങ്ങളിൽ പ്രാദേശിക വികാരം കൂടി കണക്കിലെടുത്താകും കോൺഗ്രസിന്റെ അന്തിമ പ്രഖ്യാപനം.
Story Summary
The UDF has decided to support CPIM rebels in four key constituencies—Malampuzha, Ambalappuzha, Payyanur, and Taliparamba—following internal collapses within the LDF. While G. Sudhakaran and T.K. Govindan will receive UDF backing as independents, the Congress party’s official candidate list remains delayed due to internal discussions regarding MPs contesting the state elections. RSP is the only UDF ally to have announced candidates so far.
