ന്യൂഡൽഹി: കേരളത്തിലെ നിയമസഭാ തിരഞ്ഞെടുപ്പിൽ കാഞ്ഞിരപ്പള്ളി മണ്ഡലത്തിൽ ബിജെപി സ്ഥാനാർത്ഥിയായി കേന്ദ്രമന്ത്രി ജോർജ് കുര്യൻ മത്സരിക്കും (George Kurian BJP Kanjirappally). കേരളത്തിൽ കോൺഗ്രസും സിപിഐഎമ്മും തമ്മിലുള്ള ‘അവിശുദ്ധ ബന്ധത്തിനെതിരെ’ ആണ് തന്റെ പോരാട്ടമെന്നും പാർട്ടിയേൽപ്പിച്ച ദൗത്യം ഉത്തരവാദിത്തത്തോടെ ഏറ്റെടുക്കുന്നുവെന്നും അദ്ദേഹം ന്യൂഡൽഹിയിൽ പറഞ്ഞു.
ഒരു പ്രത്യേക മിഷനുമായാണ് താൻ കേരളത്തിലേക്ക് എത്തുന്നതെന്ന് പറഞ്ഞ അദ്ദേഹം, കാഞ്ഞിരപ്പള്ളിയിൽ ബിജെപിക്ക് നിലവിൽ വലിയ അനുകൂല സാഹചര്യമാണുള്ളതെന്നും എല്ലാ വിഭാഗം ജനങ്ങളുടെയും പിന്തുണ തനിക്ക് ലഭിക്കുമെന്നും പ്രത്യാശ പ്രകടിപ്പിച്ചു. നാളെ കേരളത്തിലെത്തുന്ന അദ്ദേഹം മണ്ഡലത്തിൽ സജീവമായ പ്രചാരണ പരിപാടികൾക്ക് തുടക്കം കുറിക്കും.
നിലവിൽ ന്യൂനപക്ഷ കാര്യ മന്ത്രാലയത്തിന്റെയും ഫിഷറീസ്-മൃഗസംരക്ഷണ വകുപ്പിന്റെയും സഹമന്ത്രിയായ ജോർജ് കുര്യൻ മത്സരിക്കുന്നത് ബിജെപിക്ക് മധ്യകേരളത്തിൽ വലിയ ഊർജ്ജമാകും. മധ്യപ്രദേശിൽ നിന്നുള്ള രാജ്യസഭാ കാലാവധി ജൂണിൽ അവസാനിക്കാനിരിക്കെയാണ് അദ്ദേഹം കേരള രാഷ്ട്രീയത്തിൽ സജീവമാകുന്നത്.
മത്സരം ഇന്ത്യാ സഖ്യത്തിനെതിരെ: കേരളത്തിൽ കോൺഗ്രസും എൽഡിഎഫും ഒരുമിച്ച് ‘ഇന്ത്യാ’ സഖ്യത്തിന്റെ ഭാഗമാണെന്നും അവർ തമ്മിലുള്ള അന്തർധാര ജനങ്ങൾ തിരിച്ചറിയുമെന്നും അദ്ദേഹം അവകാശപ്പെട്ടു.
ബിജെപി ഇന്ന് പുറത്തിറക്കിയ 47 പേരുടെ ആദ്യ സ്ഥാനാർത്ഥി പട്ടികയിലാണ് ജോർജ് കുര്യന്റെ പേര് ഔദ്യോഗികമായി പ്രഖ്യാപിച്ചത്. കാഞ്ഞിരപ്പള്ളിയിൽ ക്രിസ്ത്യൻ വിഭാഗത്തിന്റെ വോട്ടുകൾ ഏകീകരിക്കാൻ ജോർജ് കുര്യന്റെ സാന്നിധ്യം സഹായിക്കുമെന്നാണ് എൻഡിഎയുടെ വിലയിരുത്തൽ. പൂഞ്ഞാറിൽ പി.സി. ജോർജും പാലയിൽ ഷോൺ ജോർജും മത്സരിക്കുന്നതോടെ കോട്ടയം ജില്ലയിലെ മൂന്ന് മണ്ഡലങ്ങളിലും വൻ മുന്നേറ്റമുണ്ടാക്കാമെന്ന് ബിജെപി പ്രതീക്ഷിക്കുന്നു.
Story Summary
Union Minister George Kurian has been named the BJP candidate for the Kanjirappally constituency in the 2026 Kerala Assembly elections. Kurian stated his fight is against the “unholy nexus” between Congress and CPIM in Kerala. He believes there is a favorable political environment in Kanjirappally and aims to seek support from all sections of society. His candidacy is part of BJP’s strategy to strengthen its influence in Central Kerala, especially among the Christian community.
