ഗാസ സിറ്റി: ഇസ്രായേൽ റാഫ അതിർത്തി അടച്ചതോടെ ഗാസയിലെ ആയിരക്കണക്കിന് രോഗികളുടെ ജീവിതം പ്രതിസന്ധിയിലായി. വിദേശത്ത് അടിയന്തര ശസ്ത്രക്രിയകൾക്കും ചികിത്സയ്ക്കുമായി കാത്തിരുന്ന കുഞ്ഞുങ്ങൾ ഉൾപ്പെടെയുള്ളവർ അതിർത്തി കടക്കാനാവാതെ മരണത്തോട് മല്ലിടുകയാണ് ( Rafah Crossing Closure). ഇറാൻ-അമേരിക്ക സംഘർഷത്തെത്തുടർന്ന് സുരക്ഷാ കാരണങ്ങൾ പറഞ്ഞാണ് ഫെബ്രുവരി 28 മുതൽ അതിർത്തികൾ ഇസ്രായേൽ അടച്ചിരിക്കുന്നത്.
അഞ്ച് മാസം മാത്രം പ്രായമുള്ള അൽമ എന്ന കുഞ്ഞിന്റെ കഥ ഗാസയിലെ ദുരവസ്ഥയുടെ നേർക്കാഴ്ചയാണ്. ശ്വാസകോശത്തിൽ മുഴയുള്ള അൽമയ്ക്ക് ശ്വസിക്കാൻ ഓക്സിജൻ മെഷീന്റെ സഹായം അത്യാവശ്യമാണ്. ജോർദാനിൽ ശസ്ത്രക്രിയയ്ക്കായി പോകാൻ തയ്യാറെടുത്തിരിക്കെയാണ് അതിർത്തി അടച്ചത്. സമാനമായ സാഹചര്യത്തിൽ ചികിത്സ കിട്ടാതെ ഹദീൽ സൊറോബ് എന്ന അമ്മയുടെ എട്ടും ആറും വയസ്സുള്ള രണ്ട് മക്കൾ കഴിഞ്ഞ മാസങ്ങളിൽ മരണപ്പെട്ടിരുന്നു.
ഗാസ ആരോഗ്യ മന്ത്രാലയത്തിന്റെ കണക്കനുസരിച്ച് ഏകദേശം 20,000 രോഗികളാണ് വിദേശത്ത് ചികിത്സ തേടി പോകാൻ കാത്തിരിക്കുന്നത്. ഇതിൽ 4,000 പേർ അർബുദ രോഗികളും 4,500 പേർ കുട്ടികളുമാണ്. ഇതിനുപുറമെ യുദ്ധത്തിൽ പരിക്കേറ്റ ആറായിരത്തോളം പേർക്കും തുടർചികിത്സ ആവശ്യമാണ്. ഗാസയിലെ ആശുപത്രികൾ തകരുകയും മരുന്നുകൾക്ക് കടുത്ത ക്ഷാമം അനുഭവപ്പെടുകയും ചെയ്യുന്ന സാഹചര്യത്തിൽ അതിർത്തി കടന്നുള്ള ചികിത്സ മാത്രമാണ് ഇവർക്ക് മുന്നിലുള്ള ഏക വഴി.
റാഫ അതിർത്തി അടയ്ക്കുന്നത് ഗാസയിലെ സാധാരണക്കാർക്ക് നൽകുന്ന കൂട്ടായ ശിക്ഷയാണെന്ന് മനുഷ്യാവകാശ സംഘടനകൾ ആരോപിക്കുന്നു. ഇത് കൂടുതൽ രോഗികളെ മരണത്തിലേക്ക് തള്ളിവിടാനേ ഉപകരിക്കൂ എന്ന് അൽ-ദമീർ അസോസിയേഷൻ മുന്നറിയിപ്പ് നൽകി. അതേസമയം, വരും ദിവസങ്ങളിൽ പരിമിതമായ തോതിൽ യാത്രക്കാരെ കടത്തിവിടാൻ അതിർത്തി തുറന്നേക്കുമെന്ന് ഇസ്രായേൽ അധികൃതർ സൂചിപ്പിച്ചിട്ടുണ്ട്.
Summary
The closure of the Rafah crossing by Israel has left thousands of patients in Gaza trapped without access to life-saving medical treatment abroad. Among those affected are infants needing urgent surgeries and thousands of cancer patients facing a severe shortage of medicine within the Strip.
