ലോസ് ആഞ്ചലസ്: 98-ാമത് ഓസ്കർ പുരസ്കാര വേദിയിൽ രാഷ്ട്രീയ നിലപാട് വ്യക്തമാക്കി പ്രമുഖ നടൻ ഹാവിയർ ബാർഡം. മികച്ച അന്താരാഷ്ട്ര ചിത്രത്തിനുള്ള പുരസ്കാരം പ്രഖ്യാപിക്കാൻ പ്രിയങ്ക ചോപ്രയ്ക്കൊപ്പം വേദിയിലെത്തിയപ്പോഴാണ് ബാർഡം പലസ്തീന് പിന്തുണ പ്രഖ്യാപിച്ചത് (Javier Bardem Free Palestine Oscars). ആഗോളതലത്തിൽ യുദ്ധങ്ങൾ തുടരുന്ന പശ്ചാത്തലത്തിൽ സമാധാനത്തിനായി അദ്ദേഹം ആഹ്വാനം ചെയ്തു.
വിജയിയെ പ്രഖ്യാപിക്കുന്നതിന് മുൻപ്, “യുദ്ധം വേണ്ട, ഫ്രീ പലസ്തീൻ” (No to war and Free Palestine) എന്ന് ഹാവിയർ ബാർഡം ഉറക്കെ പറഞ്ഞു. സദസ്സിൽ നിന്ന് വലിയ കൈയടിയാണ് ഈ പരാമർശത്തിന് ലഭിച്ചത്. ബാർഡം സംസാരിക്കുമ്പോൾ അരികിലുണ്ടായിരുന്ന പ്രിയങ്ക ചോപ്ര തലയാട്ടിക്കൊണ്ട് അദ്ദേഹത്തിന്റെ വാക്കുകളെ പിന്തുണച്ചു. റെഡ് കാർപെറ്റിലും യുദ്ധവിരുദ്ധ സന്ദേശങ്ങൾ ഉൾക്കൊള്ളുന്ന ബാഡ്ജുകൾ ബാർഡം ധരിച്ചിരുന്നു.
ബാർഡവും പ്രിയങ്കയും ചേർന്ന് പ്രഖ്യാപിച്ച മികച്ച അന്താരാഷ്ട്ര ചിത്രത്തിനുള്ള ഓസ്കർ നോർവീജിയൻ സിനിമയായ ‘സെന്റിമെന്റൽ വാല്യൂ’ (Sentimental Value) സ്വന്തമാക്കി. റെഡ് കാർപെറ്റിൽ ഭർത്താവ് നിക്ക് ജോനാസിനൊപ്പം വൈറ്റ് ഡിയോർ ഗൗണിൽ തിളങ്ങിയ പ്രിയങ്ക ചോപ്രയുടെ ചിത്രങ്ങളും ഇതിനോടകം വൈറലായിക്കഴിഞ്ഞു.
അവതാരകൻ കോനൻ ഒബ്രിയാന്റെ പ്രസംഗത്തിലും നിലവിലെ ആഗോള സംഘർഷങ്ങളെക്കുറിച്ചുള്ള പരാമർശങ്ങൾ ഉണ്ടായിരുന്നു. “എല്ലാം ശുഭകരമാണെന്ന് കരുതിയല്ല നമ്മൾ ആഘോഷിക്കുന്നത്, മറിച്ച് മികച്ചൊരു നാളെയ്ക്കായി നമ്മൾ പ്രവർത്തിക്കുന്നു എന്നതിനാലാണ്,” എന്ന് അദ്ദേഹം പറഞ്ഞു. വിനോദത്തിനൊപ്പം തന്നെ ലോകസാഹചര്യങ്ങളെ ഗൗരവത്തോടെ കാണുന്ന ഒരു വേദിയായി ഇത്തവണത്തെ ഓസ്കർ മാറി.
Summary
At the 98th Academy Awards, Spanish actor Javier Bardem made a bold political statement by calling for peace and chanting “Free Palestine” while presenting the Best International Feature Film award. Priyanka Chopra, who shared the stage with him, was seen nodding in agreement with his sentiments. The award went to the Norwegian film ‘Sentimental Value’. The ceremony was marked by several political undertones as celebrities used the platform to address ongoing global conflicts.
