തിരുവനന്തപുരം: സംസ്ഥാനത്ത് പാചകവാതക ക്ഷാമം രൂക്ഷമായതോടെ ബദൽ സംവിധാനങ്ങൾ തേടി പൊതുജനം (Kerala LPG shortage news). വിപണിയിൽ ഇൻഡക്ഷൻ കുക്കറുകൾക്കും വിറകിനും ആവശ്യക്കാർ ഏറുകയാണ്. ഹോം അപ്ലയൻസ് ഷോപ്പുകളിൽ ഇൻഡക്ഷൻ കുക്കറുകൾ വാങ്ങാൻ എത്തുന്നവരുടെ എണ്ണത്തിൽ കഴിഞ്ഞ ദിവസങ്ങളിൽ വലിയ വർധനവാണ് രേഖപ്പെടുത്തിയിരിക്കുന്നത്.
വീടുകൾക്ക് പുറമെ ഹോട്ടലുടമകളും വലിയ തോതിൽ ഇൻഡക്ഷൻ കുക്കറുകൾ വാങ്ങുന്നുണ്ട്. നഗരപ്രദേശങ്ങളിലാണ് ഇതിന് കൂടുതൽ ആവശ്യക്കാരുള്ളത്. 1,200 രൂപ മുതൽ ഇൻഡക്ഷൻ കുക്കറുകൾ ലഭ്യമാണെങ്കിലും 1,800 മുതൽ 2,500 രൂപ വരെയുള്ള മോഡലുകൾക്കാണ് വിപണിയിൽ പ്രിയം. ഇ-കൊമേഴ്സ് പ്ലാറ്റ്ഫോമുകളിലും ഇൻഡക്ഷൻ കുക്കറുകളുടെ വിൽപന കുതിച്ചുയരുകയാണ്.
വിറക് വിപണിയിൽ തീവില: പാചകവാതക പ്രതിസന്ധി വിറക് വിപണിയെയും കാര്യമായി ബാധിച്ചു. വിറകിന് ടണ്ണിന് 1,000 മുതൽ 1,500 രൂപ വരെയാണ് വർധിച്ചത്. ഹോട്ടലുകൾ വലിയ തോതിൽ വിറക് സംഭരിക്കാൻ തുടങ്ങിയതോടെ പ്രാദേശിക വിപണിയിൽ ലഭ്യത കുറഞ്ഞു.
പുളിമരം, ടണ്ണിന് 5,000 രൂപയിൽ നിന്ന് 6,000 രൂപയായി. റബർ വിറക്, 4,000 രൂപയിൽ നിന്ന് 5,000 രൂപയായി ഉയർന്നു.
പടുവിറക്: ടണ്ണിന് 3,200 രൂപയിൽ നിന്ന് 4,200 രൂപയായി വർധിച്ചു.
ഗ്യാസ് വിതരണം സാധാരണ നിലയിലാകാത്ത പക്ഷം ഇൻഡക്ഷൻ കുക്കറുകളുടെയും വിറകിന്റെയും വില ഇനിയും ഉയരാൻ സാധ്യതയുണ്ടെന്നാണ് വ്യാപാരികൾ നൽകുന്ന സൂചന.
Story Summary:
The ongoing LPG shortage in Kerala has led to a massive surge in demand for induction cookers and firewood. Retailers report a significant increase in induction cooker sales, especially in urban areas, with models priced between ₹1,800 and ₹2,500 being the most popular. Simultaneously, firewood prices have spiked by ₹1,000 to ₹1,500 per tonne due to high demand from both households and hotels, with rubber wood and tamarind wood seeing sharp price hikes.
