ന്യൂഡൽഹി: രാജ്യത്തെ ടോൾപ്ലാസകളിലെ ഫാസ്ടാഗ് വാർഷിക പാസ് നിരക്ക് വർധിപ്പിച്ചു. നിലവിലുള്ള 3000 രൂപയിൽ നിന്ന് 3075 രൂപയായാണ് നിരക്ക് ഉയർത്തിയത്. 2026 ഏപ്രിൽ 1 മുതലാണ് പുതുക്കിയ നിരക്ക് പ്രാബല്യത്തിൽ വരുന്നത്.(FASTag annual pass fee in toll plazas increased, Rs 3075 from April 1)
വർഷത്തിൽ 200 തവണ ടോൾ ഫീസില്ലാതെ പ്ലാസകൾ കടന്നുപോകാം എന്നതാണ് ഈ പാസിന്റെ പ്രധാന ആകർഷണം. സ്ഥിരമായി ദീർഘദൂര യാത്ര നടത്തുന്നവർക്കും ടോൾ പ്ലാസകൾക്ക് സമീപം താമസിക്കുന്നവർക്കും ഇത് വലിയ ലാഭകരമാണ്.
നിലവിൽ രാജ്യത്തുടനീളം 56 ലക്ഷത്തോളം പേർ ഈ വാർഷിക പാസ് സൗകര്യം പ്രയോജനപ്പെടുത്തുന്നുണ്ട്. ദേശീയ പാതകളിലും എക്സ്പ്രസ് വേകളിലുമായി ഏകദേശം 1150 ടോൾ പ്ലാസകളിൽ ഈ പാസ് ഉപയോഗിക്കാവുന്നതാണ്. 2025 ഓഗസ്റ്റ് 15-നാണ് എൻ.എച്ച്.എ.ഐ ഈ വാർഷിക പാസ് പദ്ധതി അവതരിപ്പിച്ചത്. ടോൾ പ്ലാസകളിലെ കാത്തിരിപ്പ് സമയം കുറയ്ക്കാനും സുഗമമായ യാത്ര ഉറപ്പാക്കാനും ലക്ഷ്യമിട്ടാണ് നിരക്ക് നേരിയ തോതിൽ പരിഷ്കരിച്ചിരിക്കുന്നത്. വാർഷിക പാസ് എടുത്തിട്ടുള്ളവർ കാലാവധി കഴിയുന്ന മുറയ്ക്ക് പുതിയ നിരക്കിൽ അത് പുതുക്കേണ്ടി വരും.
