ന്യൂഡൽഹി: പാചകവാതക വിതരണത്തിലെ തടസ്സങ്ങൾ നീക്കാൻ ലക്ഷ്യമിട്ടുള്ള ഇന്ത്യയുടെ നീക്കം വിജയകരമായി തുടരുന്നു (Indian LPG ship Shivalik). പേർഷ്യൻ ഗൾഫിനെയും ഒമാൻ ഉൾക്കടലിനെയും ബന്ധിപ്പിക്കുന്ന തന്ത്രപ്രധാനമായ ഹോർമൂസ് കടലിടുക്കിലൂടെ ഇന്ത്യൻ നാവികസേനയുടെ കർശന സുരക്ഷാ അകമ്പടിയോടെയാണ് ‘ശിവാലിക്’ പുറപ്പെട്ടത്.
മേഖലയിലെ സംഘർഷാവസ്ഥ കണക്കിലെടുത്ത് ഇന്ത്യൻ നാവികസേന നേരിട്ടാണ് കപ്പലിന് മാർഗ്ഗനിർദ്ദേശങ്ങൾ നൽകുന്നത്. ഇറാനുമായി നടത്തിയ നയതന്ത്ര ചർച്ചകൾക്ക് ശേഷമാണ് സുരക്ഷിത പാത ഒരുക്കിയത്. ‘ശിവാലിക്കിന്’ പിന്നാലെ അടുത്ത ആറ് മണിക്കൂറിനുള്ളിൽ രണ്ടാമത്തെ എൽ.പി.ജി കപ്പലും യാത്ര തിരിക്കും. ഘട്ടംഘട്ടമായി കൂടുതൽ കപ്പലുകളെ സുരക്ഷിതമായി പുറത്തെത്തിക്കാനാണ് ഇന്ത്യയുടെ തീരുമാനം.
തന്ത്രപ്രധാന പാത
ലോകത്തെ എണ്ണ-വാതക നീക്കത്തിന്റെ 20 ശതമാനവും നടക്കുന്നത് ഹോർമൂസ് കടലിടുക്കിലൂടെയാണ്. ഇവിടെയുണ്ടാകുന്ന തടസ്സങ്ങൾ ഇന്ത്യയിലെ ഇന്ധനവിലയെയും വിതരണത്തെയും നേരിട്ട് ബാധിക്കും. ഇതിനിടെ, റഷ്യൻ എണ്ണയുടെ കാര്യത്തിൽ അമേരിക്കൻ പ്രസിഡന്റ് ഡൊണാൾഡ് ട്രംപ് നിലപാട് മാറ്റിയത് ഇന്ത്യയ്ക്ക് ഗുണകരമാകും. റഷ്യൻ എണ്ണ വാങ്ങുന്നതിന് 30 ദിവസത്തെ ഇളവ് ട്രംപ് പ്രഖ്യാപിച്ചതോടെ, പശ്ചിമേഷ്യൻ പ്രതിസന്ധിക്കിടയിലും ഊർജ്ജ ഇറക്കുമതിയിൽ ഇന്ത്യയ്ക്ക് താത്കാലിക ആശ്വാസം ലഭിക്കും.
ഈ കപ്പലുകൾ ഇന്ത്യൻ തീരത്തെത്തുന്നതോടെ സംസ്ഥാനത്തെ പാചകവാതക ക്ഷാമത്തിന് വലിയ രീതിയിൽ കുറവുണ്ടാകുമെന്നാണ് പ്രതീക്ഷിക്കുന്നത്.
Story Summary: Amidst the Middle East conflict, the Indian LPG ship ‘Shivalik’, carrying over 40,000 metric tonnes of gas, has departed through the Strait of Hormuz under Indian Navy escort. Following diplomatic talks with Iran, India is moving its fuel ships in phases. Additionally, Donald Trump has announced a 30-day waiver for purchasing Russian oil, providing further relief to India’s energy crisis.
