ആഗ്ര: വിവാഹവാഗ്ദാനം നൽകി പീഡിപ്പിക്കുകയും വഞ്ചിക്കുകയും ചെയ്ത ആഗ്രയിലെ പോലീസ് കോൺസ്റ്റബിളിനെതിരെ വീഡിയോ സന്ദേശം പുറത്തുവിട്ട് യുവതി ആത്മഹത്യ ചെയ്തു (Agra woman suicide police constable). താജ്ഗഞ്ച് പോലീസ് സ്റ്റേഷനിലെ കോൺസ്റ്റബിളായ ജെ.വി. ഗൗതമിനെതിരെയാണ് യുവതി ആരോപണം ഉന്നയിച്ചിരിക്കുന്നത്. സംഭവത്തിന് പിന്നാലെ കോൺസ്റ്റബിളിനെ സസ്പെൻഡ് ചെയ്യുകയും കേസെടുക്കുകയും ചെയ്തു.
കഴിഞ്ഞ നാല് വർഷമായി താൻ ഗൗതമിനൊപ്പം ലിവിംഗ് ഇൻ റിലേഷൻഷിപ്പിലായിരുന്നുവെന്ന് യുവതി വീഡിയോയിൽ പറയുന്നു. വിവാഹം കഴിക്കാമെന്ന് ഉറപ്പ് നൽകി ഭാര്യയെപ്പോലെ കൂടെ താമസിപ്പിക്കുകയും പിന്നീട് പിന്മാറുകയും ചെയ്തു.പരാതിയുമായി പോലീസ് സ്റ്റേഷനെ സമീപിച്ചപ്പോൾ കോൺസ്റ്റബിളിനെതിരെ നടപടിയുണ്ടാകില്ലെന്നും അയാൾ രക്ഷപ്പെടുമെന്നുമാണ് ഉദ്യോഗസ്ഥർ മറുപടി നൽകിയതെന്ന് യുവതി ആരോപിച്ചു.
തന്നോടൊപ്പം വർഷങ്ങളോളം ജീവിച്ച ശേഷം ഗൗതം ഇപ്പോൾ മറ്റൊരു വിവാഹത്തിന് തയ്യാറെടുക്കുകയാണെന്നും ഇത് തന്നെ മാനസികമായി തകർത്തുവെന്നും യുവതി വെളിപ്പെടുത്തി.തന്റെ മരണത്തിന് ഉത്തരവാദി ഗൗതമും കുടുംബവുമാണെന്ന് വ്യക്തമാക്കിയ യുവതി, ഉത്തർപ്രദേശ് മുഖ്യമന്ത്രി യോഗി ആദിത്യനാഥിനോടും പ്രധാനമന്ത്രിയോടും മരണശേഷമെങ്കിലും തനിക്ക് നീതി ഉറപ്പാക്കണമെന്ന് വീഡിയോയിലൂടെ അഭ്യർത്ഥിച്ചു.
യുവതിയുടെ പിതാവ് നൽകിയ പരാതിയുടെ അടിസ്ഥാനത്തിൽ ആഗ്ര പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കോൺസ്റ്റബിളിനെ സസ്പെൻഡ് ചെയ്തതായും വകുപ്പുതല അന്വേഷണം നടക്കുമെന്നും പോലീസ് അറിയിച്ചു.
Story Summary: A young woman in Agra committed suicide after accusing a police constable, J.V. Gautam, of physical and mental abuse under the pretext of marriage. In her pre-death videos, she alleged they were in a live-in relationship for four years and claimed police inaction. The constable has been suspended following a complaint from her father.
