പാലക്കാട്: മണ്ണാർക്കാട് നടന്ന അനുമോദന ചടങ്ങിൽ വെച്ച് എസ്എസ്എൽസി (kt jaleel controversy mannarkkad) ഉന്നത വിജയം നേടിയ വിദ്യാർത്ഥികളെ പരസ്യമായി അപമാനിച്ച സംഭവത്തിൽ മുൻ ഉന്നതവിദ്യാഭ്യാസ മന്ത്രി കെ.ടി. ജലീലിനെതിരെ സംസ്ഥാന ബാലാവകാശ സംരക്ഷണ കമ്മീഷൻ സ്വമേധയാ കേസെടുത്തു. എസ്എസ്എൽസി പരീക്ഷയിൽ എല്ലാവിഷയങ്ങൾക്കും എ പ്ലസ് (A+) നേടിയ മിടുക്കരായ കുട്ടികളെ ആദരിക്കുന്നതിനായി സംഘടിപ്പിച്ച ‘വിജയോത്സവം’ പരിപാടിക്കിടെയായിരുന്നു വിവാദ സംഭവം. ജലീൽ കുട്ടികളെ ക്രൂരമായി മാനസികമായി പീഡിപ്പിക്കുകയും അധിക്ഷേപിക്കുകയും ചെയ്തുവെന്ന പരാതികളുടെ പശ്ചാത്തലത്തിലാണ് കമ്മീഷന്റെ അടിയന്തര ഇടപെടൽ.
പരിപാടിയിൽ മുഖ്യാതിഥിയായി പങ്കെടുത്ത കെ.ടി. ജലീൽ, വേദിയിലേക്ക് അവാർഡ് വാങ്ങാൻ എത്തിയ കുട്ടികളെ പരസ്യമായി സ്റ്റേജിൽ വിളിച്ചു വരുത്തി വെള്ളക്കടലാസിൽ എഴുതിക്കുകയായിരുന്നു. തുടർന്ന് കുട്ടികൾ എഴുതിയതിൽ അക്ഷരത്തെറ്റുകളുണ്ടെന്ന് ആരോപിച്ച് സദസ്സിനെ സാക്ഷിനിർത്തി അവരെ കടുത്ത ഭാഷയിൽ ശാസിച്ചു. പരിപാടിയിൽ പങ്കെടുത്ത കൊച്ചു കുട്ടികളോട് “നിനക്കൊന്നും അക്ഷരമറിയില്ലേ?” എന്ന് മൈക്കിലൂടെ ചോദിച്ച ജലീൽ, സ്വന്തം അഡ്രസ് തെറ്റിച്ചു എഴുതിയെന്ന് ആരോപിച്ച് ഒരു വിദ്യാർത്ഥിയെ സ്റ്റേജിന്റെ നടുവിലേക്ക് വിളിച്ചു വരുത്തി ക്രൂരമായി ചെവിയിൽ നുള്ളുകയും ചെയ്തു. എ പ്ലസ് കിട്ടിയ കുട്ടികളുടെ അറിവ് പരിശോധിക്കാനെന്ന വ്യാജേന പൊതുവേദിയിൽ വെച്ച് അവരെ മാനസികമായി തളർത്തുന്ന രീതിയിലാണ് ജനപ്രതിനിധി പെരുമാറിയതെന്നാണ് രക്ഷിതാക്കളുടെ ആക്ഷേപം.
സംഭവം സോഷ്യൽ മീഡിയയിലടക്കം വൻ വിവാദമാകുകയും ബാലാവകാശ കമ്മീഷൻ കേസെടുക്കുകയും ചെയ്തതിന് പിന്നാലെ, താൻ കുട്ടികളെ അപമാനിക്കുകയോ മാനസികമായി വേദനിപ്പിക്കുകയോ ചെയ്തിട്ടില്ലെന്ന വിചിത്ര ന്യായീകരണവുമായി കെ.ടി. ജലീൽ രംഗത്തെത്തി. കുട്ടികളുടെ ഭാഷാശുദ്ധി പരിശോധിക്കുക മാത്രമാണ് താൻ ചെയ്തതെന്നും, ഒരു അധ്യാപകൻ എന്ന നിലയിലുള്ള സ്വാതന്ത്ര്യമാണ് കാണിച്ചതെന്നുമാണ് അദ്ദേഹത്തിന്റെ വാദം. എന്നാൽ കുട്ടികളുടെ അന്തസ്സിനെ ചോദ്യം ചെയ്യുന്ന രീതിയിൽ പൊതുവേദിയിൽ പെരുമാറിയ മുൻ മന്ത്രിക്കെതിരെ ശക്തമായ നിയമനടപടികളുമായി മുന്നോട്ട് പോകാനാണ് കുട്ടികളുടെ അവകാശ സംരക്ഷണത്തിനായി നിലകൊള്ളുന്ന സംഘടനകളുടെ തീരുമാനം. സംഭവത്തിൽ മണ്ണാർക്കാട് പോലീസിനോടും വിദ്യാഭ്യാസ വകുപ്പിനോടും കമ്മീഷൻ റിപ്പോർട്ട് തേടിയിട്ടുണ്ട്.
Story Summary: The Kerala State Commission for Protection of Child Rights (KSCPCR) has registered a case against former Higher Education Minister K.T. Jaleel for allegedly humiliating SSLC A-plus students at a felicitation event in Mannarkkad. Jaleel reportedly made students write on stage, scolded them for spelling errors, and pulled a student’s ear, though he later denied harming them.
