ന്യൂയോർക്ക്: ഇംഗ്ലണ്ടിലെ സൗതാംപ്ടണിൽ നിന്ന് ചരക്ക് കപ്പലിൽ ഒളിച്ചുകടന്ന് അറ്റ്ലാന്റിക് സമുദ്രം താണ്ടി ഒരു ചുവന്ന കുറുക്കൻ (Red Fox) അമേരിക്കയിലെത്തി. ഫെബ്രുവരി 4-ന് സൗതാംപ്ടണിൽ നിന്ന് പുറപ്പെട്ട കാറുകൾ നിറച്ച കപ്പലിലാണ് ഈ വിരുതൻ കയറിപ്പറ്റിയത് (Red Fox Stows Away On Cargo Ship England to US). രണ്ടാഴ്ചത്തെ യാത്രയ്ക്ക് ശേഷം ഫെബ്രുവരി 18-ന് കപ്പൽ ന്യൂയോർക്ക് പോർട്ടിലെത്തിയപ്പോഴാണ് കുറുക്കനെ കണ്ടെത്തിയത്. നിലവിൽ ന്യൂയോർക്കിലെ പ്രശസ്തമായ ബ്രോങ്ക്സ് മൃഗശാലയുടെ സംരക്ഷണയിലാണ് ഈ അതിഥി.
ഏകദേശം രണ്ട് വയസ്സ് പ്രായം തോന്നിക്കുന്ന ഈ കുറുക്കന് അഞ്ച് കിലോയോളം തൂക്കമുണ്ട്. പ്രാഥമിക പരിശോധനയിൽ കുറുക്കൻ ആരോഗ്യവാനാണെന്ന് മൃഗശാല അധികൃതർ അറിയിച്ചു. ദീർഘദൂര യാത്രയുടെ തളർച്ചയുണ്ടെങ്കിലും പുതിയ സാഹചര്യങ്ങളുമായി കുറുക്കൻ പെട്ടെന്ന് പൊരുത്തപ്പെടുന്നുണ്ടെന്ന് മൃഗശാല ഡയറക്ടർ കീത്ത് ലവറ്റ് പറഞ്ഞു. നിലവിൽ മൃഗശാലയിലെ വെറ്ററിനറി സെന്ററിൽ പ്രത്യേക നിരീക്ഷണത്തിലാണ് കുറുക്കൻ. പഴവർഗ്ഗങ്ങളും പ്രോട്ടീനുകളും ബിസ്ക്കറ്റുകളും അടങ്ങിയ ഭക്ഷണക്രമമാണ് ഇപ്പോൾ നൽകി വരുന്നത്.
കപ്പലിൽ എവിടെയാണ് കുറുക്കൻ ഒളിച്ചിരുന്നതെന്നോ എപ്പോഴാണ് ഇതിനെ ആദ്യമായി കണ്ടെത്തിയതെന്നോ ഉള്ള കാര്യങ്ങളിൽ ഇപ്പോഴും വ്യക്തതയില്ല. കപ്പൽ തുറമുഖത്ത് എത്തിയതിന്റെ അടുത്ത ദിവസം തന്നെ അധികൃതർ കുറുക്കനെ മൃഗശാലയിൽ എത്തിച്ചു. യൂറോപ്പ്, ഏഷ്യ, വടക്കേ അമേരിക്ക എന്നിവിടങ്ങളിൽ വ്യാപകമായി കാണപ്പെടുന്ന ഇനമാണ് ‘വൾപ്പസ് വൾപ്പസ്’ എന്ന് ശാസ്ത്രീയനാമമുള്ള ഈ ചുവന്ന കുറുക്കൻ. ആരോഗ്യ പരിശോധനകൾ പൂർത്തിയായാൽ കുറുക്കന് അനുയോജ്യമായ സ്ഥിരമായ ഒരു വാസസ്ഥലം കണ്ടെത്തുമെന്ന് അധികൃതർ വ്യക്തമാക്കി.
Summary
A two-year-old red fox was discovered as a stowaway on a cargo ship that traveled from Southampton, England, to New York. The fox, weighing 11 pounds, survived the two-week journey across the Atlantic among a shipment of automobiles.
