തന്റെ ആദ്യ സിനിമയിലെ സഹതാരം വിജയ്ക്ക് ലഭിക്കുന്ന ജനപിന്തുണയെയും ആരാധകവൃന്ദത്തെയും കണ്ട് താൻ അത്ഭുതപ്പെട്ടുപോയെന്ന് വെളിപ്പെടുത്തി ആഗോള താരം പ്രിയങ്ക ചോപ്ര (Priyanka Chopra About Vijay). 2002-ൽ വിജയ് നായകനായ ‘തമിഴൻ’ എന്ന ചിത്രത്തിലൂടെയായിരുന്നു പ്രിയങ്കയുടെ സിനിമാ അരങ്ങേറ്റം. ഒരു പോഡ്കാസ്റ്റിനിടെയാണ് തന്റെ ആദ്യകാല സിനിമാ അനുഭവങ്ങളെക്കുറിച്ചും വിജയ്യുടെ താരപ്പകിട്ടിനെക്കുറിച്ചും പ്രിയങ്ക സംസാരിച്ചത്.
ഷൂട്ടിംഗ് സെറ്റിൽ നൂറുകണക്കിന് ആളുകൾ വിജയ്യെ കാണാനും അദ്ദേഹത്തിന്റെ നൃത്തം നേരിട്ട് ആസ്വദിക്കാനും തടിച്ചുകൂടാറുണ്ടായിരുന്നുവെന്ന് പ്രിയങ്ക ഓർക്കുന്നു. “പ്രശസ്തിയിലേക്കുള്ള എന്റെ ആദ്യ ചുവടുവയ്പ്പായിരുന്നു തമിഴൻ. എന്റെ സഹനടൻ വിജയ് അതിപ്രശസ്തനാണ്. ഞാൻ സെറ്റിൽ ചെല്ലുമ്പോൾ അദ്ദേഹത്തെ ഒന്ന് കാണാൻ തടിച്ചുകൂടിയ ജനക്കൂട്ടത്തെ കണ്ടപ്പോൾ, അദ്ദേഹം അനുഭവിക്കുന്നത് ദൈവതുല്യമായ ഒരു വികാരമായിരിക്കുമെന്ന് എനിക്ക് തോന്നി,” പ്രിയങ്ക പറഞ്ഞു. ഇന്ത്യയിൽ ജനങ്ങൾ സിനിമയെയും താരങ്ങളെയും അത്രമേൽ അഭിനിവേശത്തോടെയാണ് സ്നേഹിക്കുന്നതെന്നും താരം കൂട്ടിച്ചേർത്തു.
മിസ് വേൾഡ് കിരീടം നേടിയതിന് ശേഷം സിനിമയിൽ എത്തിയ പ്രിയങ്കയ്ക്ക് ക്യാമറയ്ക്ക് പിന്നിലെ പ്രവർത്തനങ്ങളെക്കുറിച്ച് അന്ന് വലിയ ധാരണയില്ലായിരുന്നു. എങ്കിലും സെറ്റിലെ ആവേശകരമായ അന്തരീക്ഷം തനിക്ക് പുതിയൊരു അനുഭവമായിരുന്നുവെന്നും താരം വ്യക്തമാക്കി. നിലവിൽ ഹോളിവുഡിലും ബോളിവുഡിലും ഒരുപോലെ സജീവമായ പ്രിയങ്കയുടെ വരാനിരിക്കുന്ന ചിത്രം എസ്.എസ്. രാജമൗലി സംവിധാനം ചെയ്യുന്ന ‘വാരണാസി’യാണ്. മഹേഷ് ബാബു നായകനാകുന്ന ഈ ചിത്രത്തിൽ പൃഥ്വിരാജ് സുകുമാരനും ഒരു പ്രധാന വേഷത്തിൽ എത്തുന്നുണ്ട്.
