ന്യൂഡൽഹി: പശ്ചിമ ബംഗാളിലെ വോട്ടർ പട്ടികയിൽ നിന്ന് പേരുകൾ നീക്കം ചെയ്തതുമായി ബന്ധപ്പെട്ട പരിശോധന നടത്തുന്ന ജുഡീഷ്യൽ ഓഫീസർമാരെ അവിശ്വസിക്കരുതെന്ന് സുപ്രീം കോടതി (Supreme Court West Bengal Voter List Case). ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് പശ്ചിമ ബംഗാൾ സർക്കാരിനും തിരഞ്ഞെടുപ്പ് കമ്മീഷനും കർശന മുന്നറിയിപ്പ് നൽകിയത്. ജുഡീഷ്യൽ ഓഫീസർമാരെ ചോദ്യം ചെയ്യാൻ ആരും തുനിയരുതെന്നും കോടതി ആഞ്ഞടിച്ചു.
സുപ്രീം കോടതിയുടെ രൂക്ഷവിമർശനം
വോട്ടർ പട്ടികയിലെ ക്രമക്കേടുകൾ പരിശോധിക്കാൻ കോടതി നിയോഗിച്ച ജുഡീഷ്യൽ ഓഫീസർമാർ നിലവിൽ തന്നെ അധിക സമയം ജോലി ചെയ്യുകയാണെന്ന് കോടതി ചൂണ്ടിക്കാട്ടി. അവരുടെ തീരുമാനങ്ങളെ ചോദ്യം ചെയ്തുകൊണ്ട് സമർപ്പിക്കപ്പെട്ട പുതിയ ഹർജിയിൽ കോടതി കടുത്ത അതൃപ്തി രേഖപ്പെടുത്തി. “ജുഡീഷ്യൽ ഓഫീസർമാരെ ചോദ്യം ചെയ്യാൻ ധൈര്യപ്പെടരുത്! അവർ ഇതിൽ കൂടുതൽ എന്ത് ത്യാഗമാണ് ചെയ്യേണ്ടത്? വോട്ടർമാരുടെ പരാതികൾ കേൾക്കാൻ അവർ കഠിനാധ്വാനം ചെയ്യുകയാണ്. ഇത് ഞാൻ സഹിക്കില്ല” – ചീഫ് ജസ്റ്റിസ് വ്യക്തമാക്കി.
അപ്പീൽ നൽകാൻ പ്രത്യേക ട്രൈബ്യൂണൽ
ജുഡീഷ്യൽ ഓഫീസർമാർ തള്ളിക്കളയുന്ന വോട്ടർമാരുടെ പരാതികൾ കേൾക്കാൻ മുൻ ഹൈക്കോടതി ചീഫ് ജസ്റ്റിസുമാരും ജഡ്ജിമാരും അടങ്ങുന്ന ‘അപ്പീൽ ട്രൈബ്യൂണലുകൾ’ രൂപീകരിക്കാൻ കോടതി ഉത്തരവിട്ടു. കൽക്കട്ട ഹൈക്കോടതി ചീഫ് ജസ്റ്റിസിനോട് ഇതിനായി അംഗങ്ങളെ നിർദ്ദേശിക്കാൻ സുപ്രീം കോടതി ആവശ്യപ്പെട്ടിട്ടുണ്ട്. ജുഡീഷ്യൽ ഓഫീസർമാരുടെ ഉത്തരവുകൾക്ക് മേൽ ഭരണപരമോ എക്സിക്യൂട്ടീവ് പരമോ ആയ ഒരു അതോറിറ്റിക്കും അപ്പീൽ കേൾക്കാൻ അവകാശമുണ്ടാകില്ലെന്ന് കോടതി വ്യക്തമാക്കി.
ലോജിസ്റ്റിക്കൽ പിന്തുണ ഉറപ്പാക്കണം
ജുഡീഷ്യൽ ഓഫീസർമാർക്ക് ആവശ്യമായ എല്ലാ സൗകര്യങ്ങളും ലോജിസ്റ്റിക്കൽ പിന്തുണയും ഉറപ്പാക്കാൻ മമത ബാനർജി സർക്കാരിനോടും തിരഞ്ഞെടുപ്പ് കമ്മീഷനോടും കോടതി നിർദ്ദേശിച്ചു. ഈ പരിശോധന പ്രക്രിയയ്ക്ക് ആവശ്യമായ ചിലവുകൾ പൂർണ്ണമായും തിരഞ്ഞെടുപ്പ് കമ്മീഷൻ വഹിക്കണം. പത്തു ലക്ഷത്തിലധികം വോട്ടർമാരുടെ പേരുകൾ നീക്കം ചെയ്തതുമായി ബന്ധപ്പെട്ട പരാതികളാണ് കോടതിയുടെ പരിഗണനയിലുള്ളത്.
Summary
The Supreme Court has issued a stern warning to the West Bengal government and the Election Commission of India against questioning the integrity of court-appointed judicial officers verifying deleted voters.
