ന്യൂയോർക്ക്: അമേരിക്കയിലെ മിഷിഗണിൽ വെള്ളിയാഴ്ച വീശിയടിച്ച ശക്തമായ ടൊർണാഡോയിലും കൊടുങ്കാറ്റിലും നാല് പേർ കൊല്ലപ്പെട്ടു (Michigan Tornado). തെക്കൻ മിഷിഗണിലെ ഗ്രാമീണ മേഖലകളിലുണ്ടായ പ്രകൃതിക്ഷോഭത്തിൽ ഒരു ഡസനിലധികം ആളുകൾക്ക് പരിക്കേൽക്കുകയും നൂറുകണക്കിന് വീടുകളും കെട്ടിടങ്ങളും തകരുകയും ചെയ്തു. പ്രദേശത്തെ വൈദ്യുതി ബന്ധം പൂർണ്ണമായും വിച്ഛേദിക്കപ്പെട്ടിരിക്കുകയാണ്.
യൂണിയൻ സിറ്റി ഉൾപ്പെടുന്ന ബ്രാഞ്ച് കൗണ്ടിയിലാണ് കൂടുതൽ നാശനഷ്ടങ്ങൾ റിപ്പോർട്ട് ചെയ്തിരിക്കുന്നത്. ഇവിടെ മൂന്ന് പേർ കൊല്ലപ്പെടുകയും പന്ത്രണ്ടോളം പേർക്ക് പരിക്കേൽക്കുകയും ചെയ്തു. കാസ് കൗണ്ടിയിൽ ഒരാൾ കൊല്ലപ്പെട്ടതായും നിരവധി പേർക്ക് പരിക്കേറ്റതായും പ്രാദേശിക അധികൃതർ സ്ഥിരീകരിച്ചു. ടൊർണാഡോ മുന്നറിയിപ്പ് നൽകിയതിന് പിന്നാലെ ത്രീ റിവേഴ്സ്, യൂണിയൻ സിറ്റി എന്നിവിടങ്ങളിൽ നിന്ന് പുറത്തുവന്ന ദൃശ്യങ്ങളിൽ കൂറ്റൻ ചുഴലിക്കാറ്റ് കെട്ടിടങ്ങളുടെ മേൽക്കൂരകൾ പറത്തുന്നതും അവശിഷ്ടങ്ങൾ വായുവിൽ ഉയർത്തുന്നതും കാണാം.
നിരവധി വീടുകളും വൻകിട കെട്ടിടങ്ങളും പാടേ തകർന്നുപോയിട്ടുണ്ട്. യൂണിയൻ ലേക്കിന് വടക്ക് ഭാഗത്താണ് ഏറ്റവും വലിയ നാശനഷ്ടങ്ങൾ ഉണ്ടായത്. ഏകദേശം രണ്ട് മൈലോളം ദൂരത്തിൽ വൈദ്യുതി ലൈനുകളും പോസ്റ്റുകളും തകർന്നു വീണു. ട്രാൻസ്ഫോർമറുകൾക്ക് കേടുപാടുകൾ സംഭവിച്ചതിനാൽ വൈദ്യുതി പുനഃസ്ഥാപിക്കാൻ ദിവസങ്ങൾ വേണ്ടിവരുമെന്ന് അധികൃതർ അറിയിച്ചു. മിഷിഗൺ ഗവർണർ ഗ്രെച്ചൻ വിറ്റ്മർ സ്റ്റേറ്റ് എമർജൻസി ഓപ്പറേഷൻ സെന്റർ ആക്ടിവേറ്റ് ചെയ്യുകയും ദുരിതാശ്വാസ പ്രവർത്തനങ്ങൾ ഏകോപിപ്പിക്കാൻ നിർദ്ദേശം നൽകുകയും ചെയ്തു.
Summary: At least four people were killed and more than a dozen injured after tornadoes and powerful storms ripped through southern Michigan on Friday.
