ടെഹ്റാൻ: ശനിയാഴ്ച പുലർച്ചെ അമേരിക്കയും ഇസ്രായേലും സംയുക്തമായി നടത്തിയ വ്യോമാക്രമണത്തിൽ കൊല്ലപ്പെട്ട ആയത്തുള്ള അലി ഖമേനിക്ക് പകരം പുതിയ പരമോന്നത നേതാവിനെ തിരഞ്ഞെടുക്കുന്ന പ്രക്രിയ അധികം നീണ്ടുപോകില്ലെന്ന് ഇറാൻ ഔദ്യോഗികമായി അറിയിച്ചു (Iran New Supreme Leader Selection). പുതിയ നേതാവിനെ തിരഞ്ഞെടുക്കാൻ അധികാരമുള്ള ‘അസംബ്ലി ഓഫ് എക്സ്പെർട്സ്’അംഗമായ അലി മൊയ്ലേമിയാണ് ഈ വിവരം വെളിപ്പെടുത്തിയത്. കഴിഞ്ഞ ശനിയാഴ്ച ഖമേനി കൊല്ലപ്പെട്ടതിന് പിന്നാലെ രാജ്യത്ത് ഉടലെടുത്ത ഭരണപരമായ അനിശ്ചിതത്വം ഒഴിവാക്കുകയാണ് ഇറാന്റെ ലക്ഷ്യം.
പുതിയ നേതാവിനെ തിരഞ്ഞെടുക്കുമ്പോൾ വ്യക്തിപരമായ താൽപ്പര്യങ്ങൾക്കോ രാഷ്ട്രീയ കക്ഷികളുടെ സ്വാധീനത്തിനോ യാതൊരു സ്ഥാനവും ഉണ്ടാവില്ലെന്ന് അസംബ്ലി അംഗങ്ങൾ സത്യപ്രതിജ്ഞ ചെയ്തതായി അലി മൊയ്ലേമി വ്യക്തമാക്കി. മതപരമായ തത്വങ്ങൾക്കും സ്വന്തം വിവേചനബുദ്ധിക്കും അനുസരിച്ചായിരിക്കും ഓരോ അംഗവും വോട്ട് രേഖപ്പെടുത്തുക. കൊല്ലപ്പെട്ട വിപ്ലവ നേതാവ് അലി ഖമേനിയെപ്പോലെ കരുത്തനായ ഒരു വ്യക്തിത്വത്തെ തന്നെയാകും പുതിയ നേതാവായി തിരഞ്ഞെടുക്കുകയെന്നും അദ്ദേഹം കൂട്ടിച്ചേർത്തു.
ഇറാന്റെ ചരിത്രത്തിലെ ഏറ്റവും നിർണ്ണായകമായ ഒരു ഘട്ടത്തിലൂടെയാണ് രാജ്യം കടന്നുപോകുന്നത്. ഇറാൻ പരമോന്നത നേതാവ് വധിക്കപ്പെട്ടതും ടെഹ്റാനിലെ അതീവ സുരക്ഷാ മേഖലകളിൽ അമേരിക്കയും ഇസ്രായേലും ബോംബാക്രമണം തുടരുന്നതും സ്ഥിതിഗതികൾ സങ്കീർണ്ണമാക്കിയിട്ടുണ്ട്. ഇറാൻ ഇതിനോടകം തന്നെ ഹോർമുസ് കടലിടുക്ക് അടയ്ക്കുകയും സൗദിയിലെയും ഖത്തറിലെയും യുഎസ് കേന്ദ്രങ്ങൾക്ക് നേരെ ഡ്രോൺ ആക്രമണം നടത്തുകയും ചെയ്തിട്ടുണ്ട്. പുതിയ നേതാവിന്റെ തിരഞ്ഞെടുപ്പ് ഇറാന്റെ ഭാവി സൈനിക നീക്കങ്ങളിൽ വലിയ സ്വാധീനം ചെലുത്തും.
