വയനാട് : ഉരുൾപൊട്ടൽ ദുരന്തബാധിതർക്കായി നിർമ്മിച്ച ടൗൺഷിപ്പിന്റെ ഒന്നാം ഘട്ടം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. നിർമ്മാണം പൂർത്തിയായ 178 വീടുകളുടെ താക്കോൽ കൈമാറ്റവും പട്ടയ വിതരണവും ചടങ്ങിൽ നടന്നു. ടൗൺഷിപ്പിലെ മുഴുവൻ വീടുകളിലേക്കും സ്മാർട്ട് ടിവികൾ നൽകിക്കൊണ്ട് ഡിവൈഎഫ്ഐ മാതൃകയായി.(Wayanad Township, DYFI provides smart TVs to all homes)
നേരത്തെ ടൗൺഷിപ്പ് നിർമ്മാണത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് 20 കോടി രൂപ സമാഹരിച്ചു നൽകിയതിന് പിന്നാലെയാണ് ഡിവൈഎഫ്ഐ ഇപ്പോൾ സ്മാർട്ട് ടിവികളും വിതരണം ചെയ്തത്. സംസ്ഥാന പ്രസിഡന്റ് വി.കെ. സനോജ്, സെക്രട്ടറി വി. വസീഫ് എന്നിവർ ടിവികൾ മുഖ്യമന്ത്രിക്ക് കൈമാറി.
മന്ത്രി പി.എ. മുഹമ്മദ് റിയാസ് ഈ നീക്കത്തെ ഫേസ്ബുക്കിൽ അഭിനന്ദിച്ചു. ആക്രി പെറുക്കിയും കൂലിപ്പണി ചെയ്തും ചായ വിറ്റും അവർ 20 കോടി രൂപ സമാഹരിച്ചു നൽകി. ഇന്ന് 178 വീടുകളിലേക്കും സ്മാർട്ട് ടിവികൾ വാങ്ങി നൽകി. ഒരു മുൻകാല പ്രവർത്തകനെന്ന നിലയിൽ വലിയ അഭിമാനം തോന്നുന്നുവെന്നാണ് അദ്ദേഹം കുറിച്ചത്. അടുത്ത കാലവർഷത്തിന് മുൻപ് ദുരന്തബാധിതരായ എല്ലാവർക്കും വീടുകൾ ലഭ്യമാക്കുമെന്ന് മുഖ്യമന്ത്രി ഉറപ്പുനൽകി.
