തിരുവനന്തപുരം: രാഷ്ട്രീയ പോരാട്ടങ്ങളിലെ കരുത്തനായ നേതാവല്ല, മറിച്ച് അമ്മയെ നഷ്ടപ്പെട്ട ഒരു മകന്റെ വേദനയോടെയാണ് മുഖ്യമന്ത്രി പിണറായി വിജയൻ മോഹൻലാലുമായുള്ള അഭിമുഖത്തിൽ സംസാരിച്ചത് (Pinarayi Vijayan Interview Mohanlal). തന്റെ ജീവിതത്തിൽ ഏറ്റവും വലിയ സ്വാധീനം ചെലുത്തിയത് അമ്മയാണെന്നും ആ വേർപാട് നികത്താനാവാത്ത ആഘാതമാണെന്നും അദ്ദേഹം വെളിപ്പെടുത്തി.
അമ്മയ്ക്ക് സുഖമില്ലാതിരുന്ന കാലത്ത് ഒരു ദിവസം ഭാര്യ കമല വിളിച്ചപ്പോൾ സംസാരത്തിൽ എന്തോ പന്തികേട് തോന്നി താൻ വേഗം വീട്ടിലെത്തിയെന്ന് മുഖ്യമന്ത്രി ഓർത്തെടുത്തു. “അമ്മയെ പതുക്കെ എന്റെ തോളിൽ ചാരിയിരുത്തി അല്പം വെള്ളം കൊടുത്തു. എന്റെ മടിയിൽ കിടന്നാണ് അമ്മ മരിച്ചത്,” ശബ്ദമിടറിക്കൊണ്ട് അദ്ദേഹം പറഞ്ഞു. മരണവിവരം മറ്റുള്ളവരെ അറിയിക്കേണ്ടത് താനായിരുന്നു. എന്നാൽ ആ സമയത്ത് ഒരക്ഷരം പോലും മിണ്ടാനാകാതെ താൻ സ്തംഭിച്ചുപോയെന്നും തന്റെ അവസ്ഥ കണ്ടപ്പോൾ തന്നെ എല്ലാവർക്കും കാര്യം മനസ്സിലായെന്നും അദ്ദേഹം കൂട്ടിച്ചേർത്തു.
തന്റെ മാതാപിതാക്കൾ വലിയ വിശ്വാസികളായിരുന്നുവെന്ന് മുഖ്യമന്ത്രി പറഞ്ഞു. അച്ഛനേക്കാൾ കൂടുതൽ അമ്മയ്ക്കായിരുന്നു വിശ്വാസം. രാമായണവും കൃഷ്ണപ്പാട്ടും അമ്മയ്ക്ക് വായിച്ചു കൊടുക്കാറുണ്ടായിരുന്നു. തനിക്ക് രണ്ട് സഹോദരന്മാരാണുള്ളത്. ബാക്കി ഏഴുപേർ ചെറുപ്രായത്തിൽ തന്നെ മരിച്ചുപോയി. അഞ്ചാം ക്ലാസ്സിൽ പഠനം അവസാനിപ്പിച്ച് വീടിനടുത്ത് ബീഡി കെട്ടാൻ പോയ സാഹചര്യത്തെക്കുറിച്ചും അദ്ദേഹം മോഹൻലാലിനോട് വിവരിച്ചു.
വളരെ കരുതലോടെയാണ് അമ്മ തന്നെ വളർത്തിയതെന്നും വിദ്യാഭ്യാസം നൽകിയതെന്നും മുഖ്യമന്ത്രി പറഞ്ഞു. രാഷ്ട്രീയ ജീവിതത്തിലെ പിണറായി വിജയനെയല്ല, വ്യക്തിജീവിതത്തിലെ പിണറായിയെയാണ് ഈ അഭിമുഖത്തിൽ മലയാളി കണ്ടത്.
Story Summary: In a heartfelt interview with actor Mohanlal, Kerala CM Pinarayi Vijayan opened up about his mother’s influence on his life. He became emotional while recalling her final moments, sharing that she passed away in his arms. The CM also discussed his family background and his early days working in a beedi-rolling unit.
