അബിയാൻ: തെക്കൻ യമനിൽ ബസ്സും ട്രക്കും കൂട്ടിയിടിച്ചുണ്ടായ അപകടത്തിൽ എട്ട് സ്ത്രീകളും കുട്ടികളുമടക്കം 16 പേർ കൊല്ലപ്പെട്ടു ( Yemen Bus Truck Collision). അബിയാൻ, ഷബ്വ പ്രവിശ്യകളെ ബന്ധിപ്പിക്കുന്ന അൽ-മഹ്ഫാദ് ജില്ലയിലെ ലാഹ്മർ മേഖലയിൽ ചൊവ്വാഴ്ചയായിരുന്നു അപകടം. സമീപകാലത്ത് യമൻ സാക്ഷ്യം വഹിച്ച ഏറ്റവും വലിയ രണ്ടാമത്തെ വാഹനാപകടമാണിത്.
അപകടത്തെത്തുടർന്ന് ബസ്സിന് തീപിടിച്ചതാണ് മരണസംഖ്യ ഉയരാൻ കാരണമായത്. ഇന്ധനമായി ഗ്യാസ് ഉപയോഗിച്ചിരുന്ന ബസ്സിലേക്ക് തീ അതിവേഗം പടരുകയായിരുന്നു. റോഡിലെ അപകടകരമായ വളവിൽ അശ്രദ്ധമായി മറികടക്കാൻ ശ്രമിച്ചതാണ് അപകടത്തിന് കാരണമായതെന്ന് സുരക്ഷാ ഉദ്യോഗസ്ഥർ വ്യക്തമാക്കി. ബസ്സിലുണ്ടായിരുന്ന ആരും തന്നെ രക്ഷപ്പെട്ടില്ലെന്നാണ് വിവരം. തകർന്നു കിടക്കുന്ന റോഡുകളും പത്ത് വർഷത്തിലേറെയായി തുടരുന്ന ആഭ്യന്തരയുദ്ധം മൂലം അറ്റകുറ്റപ്പണികൾ നടക്കാത്ത അടിസ്ഥാന സൗകര്യങ്ങളുമാണ് യമനിൽ അപകടങ്ങൾ വർദ്ധിക്കാൻ കാരണമെന്ന് നിരീക്ഷകർ ചൂണ്ടിക്കാട്ടുന്നു.
കഴിഞ്ഞ വർഷം അബിയാൻ പ്രവിശ്യയിലെ മലയോര പാതയിലുണ്ടായ അപകടത്തിൽ 17 പേർ കൊല്ലപ്പെട്ടിരുന്നു. 2026-ൽ യമനിൽ റിപ്പോർട്ട് ചെയ്യപ്പെടുന്ന ഏറ്റവും വലിയ വാഹനാപകടമാണിത്. ഹൂതി വിമതരും സർക്കാർ സേനയും തമ്മിലുള്ള പോരാട്ടം മൂലം രാജ്യത്തെ പ്രധാന റോഡുകളെല്ലാം തകർന്ന നിലയിലാണ്. അപകടത്തിൽപ്പെട്ടവരെ തിരിച്ചറിയാനുള്ള നടപടികൾ അധികൃതർ ആരംഭിച്ചിട്ടുണ്ട്.
Summary: At least 16 people, including eight women and children, were killed in a horrific collision between a bus and a truck in southern Yemen’s Abyan province.
