പാലക്കാട്: മുറ്റത്ത് കളിച്ചുകൊണ്ടിരുന്ന മൂന്ന് വയസ്സുകാരന്റെ കൈവിരൽ തെരുവുനായ കടിച്ചെടുത്തു. പിലാപ്പുഴ നന്ദനം വീട്ടിൽ ജിതേഷിന്റെയും രേവതിയുടെയും മകൻ ശിവാംശിനാണ് പരിക്കേറ്റത്. കുട്ടിയുടെ വലതുകൈയിലെ ചെറുവിരലിന്റെ പകുതിയോളം നായ കടിച്ചെടുക്കുകയായിരുന്നു.(Stray dog in Palakkad bit off a 3-year-old boy’s little finger)
കഴിഞ്ഞ ദിവസം ഉച്ചയ്ക്ക് 12 മണിയോടെയായിരുന്നു സംഭവം. മുത്തശ്ശനും മുത്തശ്ശിക്കുമൊപ്പം വരാന്തയിൽ നിൽക്കുകയായിരുന്ന ശിവാംശ് മുറ്റത്തേക്കിറങ്ങിയ ഉടനെ നായ ഓടിവന്ന് ആക്രമിക്കുകയായിരുന്നു. കുട്ടിയുടെ വിരൽ അറ്റ നിലയിലായിരുന്നു.
ഉടൻതന്നെ രക്തം വാർന്ന നിലയിൽ കുട്ടിയെ ആശുപത്രിയിൽ എത്തിച്ചു. ശിവാംശിന് പ്രതിരോധ വാക്സിൻ നൽകിയിട്ടുണ്ട്. കുട്ടി ഇപ്പോൾ 48 മണിക്കൂർ നിരീക്ഷണത്തിലാണ്. വിരലിന് പ്ലാസ്റ്റിക് സർജറി ആവശ്യമാണെന്ന് ഡോക്ടർമാർ നിർദ്ദേശിച്ചു.
