ഡബ്ലിൻ: അയർലൻഡിലെ ഗാൽവേ സർവ്വകലാശാലയിലുള്ള ഫുഡ് ബാങ്കിന് മുന്നിൽ വിദ്യാർത്ഥികൾ വരിനിൽക്കുന്ന ചിത്രം വടക്കുകിഴക്കൻ യൂറോപ്പിൽ ഇന്ത്യൻ സമൂഹത്തിന് നേരെയുള്ള വംശീയ വിദ്വേഷം വർദ്ധിപ്പിക്കുന്നു (Racist Attacks Against Indians In Ireland). ജീവിതച്ചെലവ് വർദ്ധിച്ചതിനെത്തുടർന്ന് സർവ്വകലാശാലയിലെ വിദ്യാർത്ഥികൾ നടത്തുന്ന ‘സ്പെയർ’ ഫുഡ് പാൻട്രിയിൽ സഹായം തേടിയെത്തിയവരുടെ ചിത്രമാണ് വിദ്വേഷ പ്രചാരണത്തിന് ഉപയോഗിക്കുന്നത്. ചിത്രത്തിൽ ദക്ഷിണേഷ്യൻ വംശജരായ വിദ്യാർത്ഥികളെ മാത്രം ലക്ഷ്യം വെച്ചാണ് സോഷ്യൽ മീഡിയയിൽ അധിക്ഷേപങ്ങൾ നടക്കുന്നത്.
അയർലൻഡിലെ സാമ്പത്തിക പ്രതിസന്ധിയെക്കുറിച്ച് ‘ഐറിഷ് ടൈംസ്’ പ്രസിദ്ധീകരിച്ച റിപ്പോർട്ടിലെ ചിത്രമാണ് വിവാദമായത്. ഫുഡ് ബാങ്കിന് മുന്നിൽ വിവിധ വംശത്തിൽപ്പെട്ട വിദ്യാർത്ഥികൾ ഉണ്ടായിരുന്നെങ്കിലും, ഇന്ത്യൻ വംശജരെ മാത്രം അടയാളപ്പെടുത്തിക്കൊണ്ട് അവരെ നാടുകടത്തണമെന്ന തരത്തിലുള്ള പരാമർശങ്ങൾ എക്സ് പ്ലാറ്റ്ഫോമിൽ വ്യാപകമായി. വിദേശ വിദ്യാർത്ഥികൾക്ക് സ്വന്തമായി ചിലവ് കണ്ടെത്താൻ ശേഷിയില്ലെങ്കിൽ എന്തിന് അയർലൻഡിൽ വരുന്നു എന്നും, ഇവർ സൗജന്യ സേവനങ്ങൾ കൊള്ളയടിക്കുന്നു എന്നും തരത്തിലുള്ള വംശീയ ചുവയുള്ള കമന്റുകളാണ് ഉയരുന്നത്. എന്നാൽ, ഫുഡ് ബാങ്ക് ഉപയോഗിക്കുന്നവരുടെ ദേശീയത തിരിച്ചുള്ള കണക്കുകൾ റിപ്പോർട്ടിൽ നൽകിയിരുന്നില്ല.
Is it my imagination but are most, if not all, of the “students” in that queue foreign? If they are mostly foreign then perhaps that explains the numbers turning up for free food. In order to study here, aren’t foreign students supposed to be able to support themselves?
— Paddy@Dublin (@PaddyDubli39323) February 21, 2026
അയർലൻഡിൽ ഇന്ത്യക്കാർക്ക് നേരെ ശാരീരിക ആക്രമണങ്ങൾ വർദ്ധിച്ചുവരുന്ന പശ്ചാത്തലത്തിലാണ് ഈ ഓൺലൈൻ അധിക്ഷേപവും നടക്കുന്നത്. കഴിഞ്ഞ വർഷം ഡബ്ലിനിൽ ഒരു ഇന്ത്യൻ യുവാവിനെ ക്രൂരമായി മർദ്ദിക്കുകയും കുത്തിപ്പരിക്കേൽപ്പിക്കുകയും ചെയ്തിരുന്നു. ഇതിനെത്തുടർന്ന്, അയർലൻഡിലെ ഇന്ത്യൻ എംബസി കഴിഞ്ഞ മാസം ഇന്ത്യൻ പൗരന്മാർക്കായി പ്രത്യേക സുരക്ഷാ നിർദ്ദേശം പുറപ്പെടുവിച്ചിരുന്നു. ആളൊഴിഞ്ഞ സ്ഥലങ്ങളിൽ ഒറ്റയ്ക്ക് യാത്ര ചെയ്യരുതെന്നും സുരക്ഷാ മുൻകരുതലുകൾ എടുക്കണമെന്നുമാണ് എംബസി നിർദ്ദേശിച്ചിരിക്കുന്നത്. വംശീയമായ വിദ്വേഷം ഓൺലൈനിൽ നിന്നും തെരുവുകളിലേക്ക് പടരുന്നത് വലിയ ആശങ്കയാണ് സൃഷ്ടിക്കുന്നത്.
Summary: A photo of students at a University of Galway food bank sparked racist attacks against Indians on social media, highlighting rising xenophobia in Ireland.
