സ്റ്റുട്ട്ഗാർട്ട്: കുട്ടികളുടെ മാനസികാരോഗ്യവും സുരക്ഷയും മുൻനിർത്തി 14 വയസ്സിൽ താഴെയുള്ളവർക്ക് സോഷ്യൽ മീഡിയ ഉപയോഗിക്കുന്നതിന് നിരോധനം ഏർപ്പെടുത്താൻ ജർമ്മനി ഒരുങ്ങുന്നു (Germany Social Media Ban). ചാൻസലർ ഫ്രീഡ്രിച്ച് മെർസിന്റെ നേതൃത്വത്തിലുള്ള ഭരണകക്ഷിയായ ക്രിസ്റ്റ്യൻ ഡെമോക്രാറ്റിക് യൂണിയൻ (CDU) ഇത് സംബന്ധിച്ച പ്രമേയം പാസാക്കി. നിയമം ലംഘിക്കുന്ന ഓൺലൈൻ പ്ലാറ്റ്ഫോമുകൾക്ക് കനത്ത പിഴ ഈടാക്കാനും നീക്കമുണ്ട്.
സോഷ്യൽ മീഡിയ ഉപയോഗിക്കുന്നതിന് 14 വയസ്സ് എന്ന കുറഞ്ഞ പ്രായപരിധി നിശ്ചയിക്കണമെന്നും 16 വയസ്സ് വരെയുള്ള കുട്ടികൾക്ക് ഡിജിറ്റൽ ലോകത്ത് പ്രത്യേക സംരക്ഷണം ഉറപ്പാക്കണമെന്നുമാണ് ഭരണകക്ഷിയുടെ ആവശ്യം. ഇതിനായി സോഷ്യൽ മീഡിയ പ്ലാറ്റ്ഫോമുകളിൽ കർശനമായ പ്രായപരിശോധനാ സംവിധാനങ്ങൾ കൊണ്ടുവരും. യൂറോപ്പിലെ മറ്റ് രാജ്യങ്ങളായ സ്പെയിൻ, ഗ്രീസ്, ഫ്രാൻസ്, ബ്രിട്ടൻ എന്നിവയും സമാനമായ നിയന്ത്രണങ്ങളെക്കുറിച്ച് ആലോചിക്കുന്നുണ്ട്. കഴിഞ്ഞ വർഷം കുട്ടികൾക്ക് സോഷ്യൽ മീഡിയ വിലക്കിക്കൊണ്ട് ഓസ്ട്രേലിയ ലോകത്തിന് മാതൃകയായിരുന്നു.
എന്നാൽ, ഇത്തരം നിയന്ത്രണങ്ങൾ അമേരിക്കൻ കമ്പനികളെ ലക്ഷ്യം വെച്ചുള്ളതാണെന്നാരോപിച്ച് യുഎസ് പ്രസിഡന്റ് ഡൊണാൾഡ് ട്രംപ് രംഗത്തെത്തിയത് യൂറോപ്യൻ രാജ്യങ്ങൾക്ക് വെല്ലുവിളിയാകുന്നുണ്ട്. പുതിയ സാങ്കേതിക നികുതികളോ നിയന്ത്രണങ്ങളോ ഏർപ്പെടുത്തിയാൽ തിരിച്ചടിയുണ്ടാകുമെന്ന് ട്രംപ് മുന്നറിയിപ്പ് നൽകിയിട്ടുണ്ട്. ജർമ്മനിയിൽ സംസ്ഥാന സർക്കാരുകൾ തമ്മിലുള്ള ധാരണയിലൂടെ മാത്രമേ ഈ നിയമം നടപ്പിലാക്കാൻ സാധിക്കൂ. കുട്ടികൾക്കിടയിൽ ഈ നീക്കം സമ്മിശ്ര പ്രതികരണമാണ് ഉണ്ടാക്കുന്നത്. സോഷ്യൽ മീഡിയ അഡിക്ഷൻ കുറയ്ക്കാൻ ഇത് സഹായിക്കുമെന്ന് ഒരു വിഭാഗം അധ്യാപകർ പറയുമ്പോഴും, നിയന്ത്രണങ്ങൾ ഏർപ്പെടുത്തേണ്ടത് സർക്കാരല്ല മാതാപിതാക്കളാണെന്ന് ചില വിദ്യാർത്ഥികൾ അഭിപ്രായപ്പെടുന്നു.
Summary: Germany’s ruling CDU party, led by Chancellor Friedrich Merz, has passed a motion to ban social media use for children under 14.
