വാഷിംഗ്ടൺ: ഡാനിഷ് സ്വയംഭരണ പ്രദേശമായ ഗ്രീൻലാൻഡിലേക്ക് അമേരിക്കൻ ഹോസ്പിറ്റൽ ഷിപ്പ് അയക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് (Donald Trump Greenland Hospital Ship Plan). ഗ്രീൻലാൻഡിൽ രോഗബാധിതരായ നിരവധി പേർക്ക് ശരിയായ ചികിത്സ ലഭിക്കുന്നില്ലെന്നും അവരെ സഹായിക്കാനാണ് ഈ നീക്കമെന്നുമാണ് ട്രംപിന്റെ വിശദീകരണം. ലൂസിയാന ഗവർണർ ജെഫ് ലാൻഡ്രിയുമായി സഹകരിച്ചാണ് ഈ പദ്ധതിയെന്ന് അദ്ദേഹം വ്യക്തമാക്കി.
വൈറ്റ് ഹൗസിൽ റിപ്പബ്ലിക്കൻ ഗവർണർമാർക്കായി സംഘടിപ്പിച്ച വിരുന്നിനിടെയാണ് ട്രംപ് തന്റെ സോഷ്യൽ മീഡിയ പോസ്റ്റിലൂടെ ഈ പ്രഖ്യാപനം നടത്തിയത്. “അവിടെയുള്ള ആളുകൾക്ക് ചികിത്സ ലഭിക്കുന്നില്ല, വലിയൊരു ഹോസ്പിറ്റൽ ബോട്ട് അങ്ങോട്ടേക്ക് തിരിച്ചുകഴിഞ്ഞു” എന്നായിരുന്നു ട്രംപിന്റെ കുറിപ്പ്. എന്നാൽ ഗ്രീൻലാൻഡിലെ അധികൃതരോ ഡെന്മാർക്ക് സർക്കാരോ ഇത്തരമൊരു സഹായം ആവശ്യപ്പെട്ടോ എന്ന കാര്യത്തിൽ വ്യക്തതയില്ല. ഗ്രീൻലാൻഡിനെ വിലയ്ക്ക് വാങ്ങാനുള്ള ട്രംപിന്റെ താല്പര്യം നേരത്തെ തന്നെ ഡെന്മാർക്കുമായി നയതന്ത്ര തർക്കങ്ങൾക്ക് കാരണമായിരുന്നു.
ഈ പ്രഖ്യാപനത്തിന് ഏതാനും മണിക്കൂറുകൾക്ക് മുൻപ് ഗ്രീൻലാൻഡ് തീരത്ത് യുഎസ് അന്തർവാഹിനിയിലുണ്ടായിരുന്ന ഒരു സൈനികനെ അടിയന്തര ചികിത്സയ്ക്കായി ഡാനിഷ് സേന ഒഴിപ്പിച്ചിരുന്നു. ഇതുമായി ട്രംപിന്റെ പ്രഖ്യാപനത്തിന് ബന്ധമുണ്ടോ എന്ന് വ്യക്തമല്ല. അമേരിക്കയുടെ പക്കൽ ‘മെഴ്സി’, ‘കംഫർട്ട്’ എന്നിങ്ങനെ രണ്ട് വലിയ ഹോസ്പിറ്റൽ കപ്പലുകളാണുള്ളത്. ട്രംപിന്റെ ഗ്രീൻലാൻഡ് മോഹത്തിന് തടയിടാൻ ഡാനിഷ് രാജാവ് ഫ്രെഡറിക് കഴിഞ്ഞ മാസം അവിടെ സന്ദർശനം നടത്തിയിരുന്നു. നാറ്റോ സഖ്യത്തിനുള്ളിൽ പോലും ഈ വിഷയം വലിയ ചർച്ചയായിരിക്കെയാണ് ട്രംപിന്റെ പുതിയ നീക്കം.
Summary: President Donald Trump announced plans to send a U.S. hospital ship to Greenland to treat people he claims are not receiving proper care.
