വാഷിംഗ്ടൺ ഡി.സി: കാലാവസ്ഥാ വ്യതിയാനത്തിനെതിരെയുള്ള പോരാട്ടത്തിൽ നിർണ്ണായകമായിരുന്ന ‘എൻഡേഞ്ചർമെന്റ് ഫൈൻഡിംഗ്’ റദ്ദാക്കി അമേരിക്കൻ പ്രസിഡന്റ് ഡൊണാൾഡ് ട്രംപ് (Trump revokes climate regulations). ഹരിതഗൃഹ വാതകങ്ങൾ മനുഷ്യന്റെ ആരോഗ്യത്തിന് ഹാനികരമാണെന്ന ശാസ്ത്രീയ കണ്ടെത്തലാണ് ട്രംപ് സർക്കാർ റദ്ദാക്കിയത്. ഇതോടെ, വാഹനങ്ങളിൽ നിന്നുള്ള പുക മലിനീകരണം നിയന്ത്രിക്കുന്നതിനുള്ള ഫെഡറൽ നിയമങ്ങളുടെ നിയമപരമായ അടിത്തറ ഇല്ലാതായി.
2012 മുതൽ 2027 വരെയുള്ള മോഡൽ വാഹനങ്ങൾക്കും എഞ്ചിനുകൾക്കും ബാധകമായിരുന്ന മലിനീകരണ നിയന്ത്രണ മാനദണ്ഡങ്ങളും ഇതോടെ അവസാനിച്ചു. ഒബാമ ഭരണകാലത്തെ ഈ നയങ്ങൾ അമേരിക്കൻ വാഹന വ്യവസായത്തിന് കനത്ത തിരിച്ചടിയായെന്നും ഉപഭോക്താക്കൾക്ക് വില വർദ്ധിക്കാൻ കാരണമായെന്നുമാണ് ട്രംപിന്റെ വാദം. ഇപിഎ അഡ്മിനിസ്ട്രേറ്റർ ലീ സെൽഡിനൊപ്പമാണ് ട്രംപ് ഈ പ്രഖ്യാപനം നടത്തിയത്.
കാലാവസ്ഥാ വ്യതിയാനം ഒരു തട്ടിപ്പാണെന്ന് വിശ്വസിക്കുന്ന ട്രംപ്, നേരത്തെ തന്നെ പാരീസ് കാലാവസ്ഥാ ഉടമ്പടിയിൽ നിന്ന് അമേരിക്കയെ പിൻവലിച്ചിരുന്നു. പുതിയ നീക്കം അമേരിക്കയിലെ കാർബൺ പുറന്തള്ളൽ വർദ്ധിപ്പിക്കുമെന്നും പ്രകൃതിക്ഷോഭങ്ങൾക്കും ഇൻഷുറൻസ് ചെലവ് വർദ്ധിക്കാനും കാരണമാകുമെന്നും പരിസ്ഥിതി സംഘടനകൾ മുന്നറിയിപ്പ് നൽകുന്നു. എന്നാൽ, ഈ നിയമങ്ങൾ ഒഴിവാക്കുന്നത് വഴി നികുതിദായകർക്ക് 1.3 ട്രില്യൺ ഡോളർ ലാഭിക്കാനാകുമെന്നാണ് ഇപിഎയുടെ വാദം.
Summary: President Donald Trump has revoked the legal basis for climate regulations and ended vehicle emission standards, marking a major shift in U.S. environmental policy.
